އިލެކްޝަންސް ކޮމިޝަން (އީސީ) ގެ މަންބަރު ކަމަށް ހިއުމަން ރައިޓްސް ކޮމިޝަން (އެޗްއާރްސީއެމް) ގެ ކުރީގެ ނައިބު ރައީސް މުހައްމަދު ޒާހިދާއި ހޯމްލޭންޑް މިނިސްޓްރީގެ ކުރީގެ ޕާމަނަންޓް ސެކްރެޓަރީ އަބްދުއްރަހްމާން ސޮލާހު ރަޝީދު އައްޔަން ކުރަން ފާސްކޮށްފިއެވެ.
ދައުރުން ބޭރުން މިއަދު ބޭއްވި މަޖިލީހުގެ ޖަލްސާގައި ވަނީ އީސީގެ މެންބަރު ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުށަހަޅުއްވާފައިވާ ދެ ފަރާތަށް ވޯޓަށް އަހާފައެވެ. އެގޮތުން ޒާހިދަށް އީސީގެ މެންބަރުކަން ދިނުމަށް އެހި ވޯޓުގައި ޖުމްލަ 68 މެންބަރުން ވޯޓުގައި ބައިވެރިވެވަޑައިގެންފައިވާ އިރު، ހުރިހާ މެންބަރުން ވެސް ވަނީ ފެންނަ ކަމަށް ވޯޓު ދެއްވާފައެވެ.
ހަމައެއާއެކު ސޮލާހު އަށް އީސީގެ މެންބަރުކަން ދިނުމަށް ވޯޓަށް އަހާފައިވާ އިރު، އެ ވޯޓުގައި ޖުމްލަ 68 މެންބަރުން ވަނީ ބައިވެރިވެވަޑައިގެންފައެވެ. ހުރިހާ މެންބަރުން ވެސް ވަނީ ފެންނަ ކަމަށް ވޯޓު ދެއްވާފައެވެ.
މިއާއެކު މި ދެ ބޭފުޅުން ވެސް އީސީގެ މެނަބރަު ކަމަށް ހޮވުމަށް ވަނީ ފާސްވެފައެވެ.
އީސީގެ މެނަބރު ކަމަށް ދެ ބޭފުޅުން ހޮވަން ނިންމާފައި މި ވަނީ ބޮޑެތި ތުހުމަތުތަކާއެކު އިލެކްޝަންސް ކޮމިޝަން (އީސީ)ގެ ކުރީގެ ނައިބު ރައީސް އަލީ ނަޝާތާއި މެންބަރު މުހައްމަދު އާސިފް މަގާމުން ވަކިކުރުމުންނެވެ. މިނިވަން މުއައްސަސާތަކާ ބެހޭ ކޮމިޓީން ތުހުމަތުކުރި ގޮތުގައި ނަޝާތާއި އާސިފްގެ އިތުރުން ޒާހިރު ވަނީ، ވިޔަފާރިކުރާ ފަރާތަކާ ގުޅިގެން ކޮމިޝަނަށް ވަކި ވިޔަފާރި ކުންފުންޏެއް މެދުވެރިކޮށް ކޮމްޕިއުޓަރުތަކެއް ހޯދާފައެވެ.
މީގެ އިތުރުން މި ތިން މެންބަރުންނާ ގުޅުން އޮންނަ ވިޔަފާރިއަކުން ކޮމިޝަނަށް ބައެއް ތަކެތި ހޯދާފައިވާ ކަމާއި އެގޮތުން ކޮންމެ މުއާމަލާތަކުން ބޮޑެތި މަންފާ ހޯދަމުން ދިޔަ ކަމަށްވެސް ތުހުމަތުކޮށްފައި ވެއެވެ.
އިލެކްޝަންސް ކޮމިޝަންގެ މެންބަރު ކަމުގެ މަގާމު ހުސްވާތާ 60 ދުވަހުގެ ތެރޭގައި އެ މަގާމަށް މެންބަރަކު އައްޔަންކުރަން ޖެހޭ އިރު، މަޖިލީހުގެ ދައުރު ނުފެށެނީސް އެ މުއްދަތު ހަމަވާނެއެވެ. އެހެންކަމުން ދައުރުން ބޭރުގެ ޖަލްސާއެއް ބާއްވާފައި މި ވަނީ މި މެންބަރުން ހޮވުމަށް ވޯޓަށް އެހުމަށެވެ.
