ސިޔާސީ ޕާޓީތަކަށް މެންބަރުން ވެއްދުމުގެ މަސައްކަތް ވަގުތީ ގޮތުން މެދުކަނޑާލަން އިލެކްޝަންސް ކޮމިޝަން (އީސީ)އިން ނިންމައިފިއެވެ.
އީސީއިން ބުނީ ސިޔާސީ ޕާޓީތަކަށް މެންބަރުން ވެއްދުމުގެ ނިޒާމު ހަރުދަނާކޮށް ޑިޖިޓަލް ނިޒާމަކަށް ބަދަލުކުރުމުގެ ގޮތުން މިހާރު ބޭނުންކުރަމުން އަންނަ "ސިމެދަ" ޕޯޓަލް މެދުވެރިކޮށް ފޯމު ހުށަހެޅުން މި މަހުގެ 30ގެ ނިޔަލަށް ހުއްޓާލުމަށް މިއަދު ނިންމާފައިވާ ކަމަށެވެ.
އެގޮތަށް ނިންމި ނަމަވެސް "މައި ޕޯޓަލް" މެދުވެރިކޮށް ޕާޓީއިން ވަކިކުރުމުގެ ހިދުމަތް މެދުނުކެނޑި ކުރިއަށްދާނެ ކަމަށް އީސީއިން ވަނީ ބުނެފައެވެ.
ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދުއަށް އެނގިވަޑައިގަތުމެއްނެތި ޒިޔާދު ޕީއެންސީއަށް ރަޖިސްޓަރީކުރުމަށްޓަކައި އީސީއަށް ފޯމެއް ހުށަހަޅާފައިވާކަން އީސީގެ ސަމާލުކަމަށް އައުމާ ގުޅިގެން، އެ ފޯމު ބާތިލްކޮށްފައިވާ ކަމަށް އީސީއިން ވަނީ ބުނެފައެވެ. އަދި މިކަމާ ގުޅިގެން ޒިޔާދުގެ މެންބާޝިޕް ހައިސިއްޔަތަށް އެއްވެސް ބަދަލެއް އައިސްފައިނުވާކަން ވެސް އީސީއިން ވަނީ ފާހަގަކޮށްފައެވެ.
އީސީއިން ބުނީ ޒިޔާދުއަށް އެނގިވަޑައިގަތުމެއްނެތި، ޕީއެންސީއަށް ރަޖިސްޓަރީކުރުމަށްޓަކައި އެ ކޮމިޝަނަށް ފޯމެއް ހުށަހަޅާފައިވާތީ އެކަމުގައި ޒިންމާވާ ފަރާތްތަކުގެ މައްސަލަ އިތުރަށް ބަލައި ފިޔަވަޅުއަޅާނެ ކަމަށެވެ. އަދި މި މައްސަލައާ ގުޅިގެން އިދާރީ ގޮތުން ފުރިހަމަކުރަންޖެހޭ ކަންކަން އިތުރަށް ހަރުދަނާކުރުމުގެ މަސައްކަތްތައް ކުރަމުންދާ ކަމަށެވެ.
މިފަދަކަމެއް އިތުރަށް ތަކުރާރުނުވާނޭ ފަދައިން އިދާރީ އަދި ގާނޫނީ އިންތިޒާމުތައް ހަމަޖައްސާނެކަމުގެ ޔަގީންކަން އީސީއިން ވަނީ ދީފައެވެ.
