އޭންޓި ކޮރަޕްޝަން ކޮމިޝަން (އޭސީސީ)ގެ އެންމެ ބޮޑު ކަންބޮޑުވުމަކީ ގެދޮރުވެރިޔާގެ ސްކީމްގެ ދަށުން ފްލެޓް ލިބޭ މީހުންގެ ލިސްޓު އެކުލަވާލުމުގައި ހަމަހަމަކަމާއެކު އަމަލުކޮށްފައިނުވުން ކަމަށް ހައުސިން މިނިސްޓަރު ޑރ. އަބްދުﷲ މުއްތޮލިބް ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ވިދާޅުވީ އޭސީސީގެ ތަހުގީގުގައި އެންމެ ބޮޑަށް ފާހަގަކޮށްފައި ވަނީ މާލޭގައި މެދުނުކެނޑި އުޅެމުންދާ މުއްދަތު ބެލުމުގައި އެއް ހަމައެއް ގެންގުޅިފައި ނުވާކަން ކަމަށެވެ.
"ގެދޮރުވެރިޔާ" ސްކީމުގެ ދަށުން މިހާރު އިމާރާތް ކުރަމުންދާ 4،000 ފްލެޓު ލިބޭ މީހުންގެ ލިސްޓުގެ ވެރިފިކޭޝަން ޕްރޮސެސްއެއް ކުރިއަށް ގެންދިއުމަށް ހައުސިން މިނިސްޓްރީއިން ވަނީ ނިންމާފައިވާއެވެ.
މިނިސްޓަރު ވިދާޅުވީ ވެރިފިކޭޝަން ޕްރޮސެސް ކުރިއަށް ދާއިރު، މާލޭގައި ދިރިއުޅުނުކަމުގެ މުއްދަތަށް މެދުކެނޑުމެއް އައިކަމަށް ބަލާނީ 1 އަހަރު ދުވަހަށްވުރެ ދިގު މެދުކެނޑުމެއް އައިސްފައިވާނަމަ ކަމަށެވެ. އަދި މިގޮތަށް ނިންމި މައިގަނޑު ސަބަބަކީ މެދުކެނޑުން މާނަކޮށްފައި ނުވުމުގެ އިތުރުން ވަޒީފާއެއް ނެތުމުގެ ސަބަބުން ނުވަތަ އެހެންވެސް ސަބަބަކާ ހުރެ މާލޭގައި އުޅޭ ކަމުގެ ލިޔުން ނެތް މުއްދަތެއްގެ ސަބަބުން ޝަރުތު ހަމަނުވާ ފަރާތަކަށްވެ، ލިސްޓުން އުނިވެ ދިއުމުގެ ފުރުސަތު ކުޑަކުރުމަށްޓަކައި ކަމަށް މިނިސްޓަރު ވިދާޅުވިއެވެ.
މީގެއިތުރުން 3 ހާލަތެއްގައި މާލޭގައި ދިރިއުޅުނު މުއްދަތު މެދުކެނޑުން އިސްތިސްނާކުރަން ކަނޑައަޅާފައިވާ ކަމަށް މިނިސްޓަރުގެ ވާހަކައިގައި ވަނީ ފާހަގަކޮށްފައެވެ.
އެއީ:
- މާލޭގައި ވަޒީފާ އަދާކުރާ ފަރާތްތަކުގެ ތެރެއިން ވަކި މުއްދަތަކަށް މާލޭއިން ބޭރުގައި ވަޒީފާ އަދާކޮށްފައިވާ މުއްދަތު
- މަތީ ތައުލީމު ހާސިލްކުރުމަށް ރާއްޖެއިން ބޭރުގައި ނުވަތަ މާލެއިން ބޭރުގައި ހޭދަކޮށްފައިވާ މުުއްދަތު
- މާލޭގައި އާއިލާ ދިރިއުޅޭ ފަރާތްތަކުގެ ތެރެއިން ރިސޯޓެއްގައި ވަޒީފާ އަދާކޮށްފައިވާ މުއްދަތު
މުއްތޮލިބް ވިދާޅުވީ މި މުއްދަތު އިސްތިސްނާކުރަން ނިންމާފައި ވަނީ ވެރިފައިކުރެވޭ ސަބަބަކާހުރެ މުއްދަތު ނުގުނާނަމަ އެ މީހުންގެ ހައްގުތައް ގެއްލިގެންދާތީ ކަމަށެވެ.
