މިދިޔަ އަހަރު ފުލުހުން މަގުމަތީގެ ސަމާމަތާއި ރައްކާތެރިކަން ކަށަވަރުކުރުމުގެ ގޮތުން 15 ހާސް އުޅަނދު ޓޯކޮށް 7 ހާހަށްވުރެ ގިނަ އުޅަނދަށް ފިޔަވަޅު އަޅާފައިވާކަމަށް ބުނެފިއެވެ.
ފުލުހުން މިއަދު އާންމުކުރި ތަފާސްހިސާބުތަކުން ހާމަވާ ގޮތުގައި ނިމިދިޔަ 2024 ވަނަ އަހަރު ފުލުހުން ހިންގި އޮޕަރޭޝަންތަކުގައި 15،514 އުޅަނދު ޓޯކޮށް، 7،606 އުޅަނދާ މެދު ފިޔަވަޅު އަޅާފައެވެ.
ފުލުހުން ޓޯކޮށްފައިވަނީ:
- 11،645 ސައިކަލު
- 2،567 ކާރު
- 478 ޕިކަޕު
- 369 ވޭން
- 87 ޓްރަކް
ފުލުހުން ބުނީ މީގެ ތެރެއިން 546 އުޅަނދެއް ނައްތާލާފައިވާކަމަށާއި އަދި 13،562 އުޅަނދު ވެރިފަރާތާއި ހަވާލުކުރެވިފައިވާކަމަށެވެ.
ތަފާސްހިސާބުތަކުން ހާމަވާގޮތުގައި ފުލުހުން ވަނީ ޖުމްލަ 73،953 އުޅަނދު ޗެކްކޮށް، 66،347 މީހަކަށް ނަސޭހަތްދީފައެވެ. ފުލުހުން ބުނީ ނުރައްކާތެރިކޮށް ދުއްވި ކަމުގެ 293 މައްސަލައެއް މިދިޔަ އަހަރު ފުލުހުން ބަލާފައިވާ ކަމަށާއި އެއީ ދެ ފުރޮޅުލީ 271 އުޅަނދު އަދި ހަތަރު ފުރޮޅުލީ 22 އުޅަނދު ކަމަށެވެ.
މީގެއިތުރުން ފުލުހުން ބުނީ ލައިސެންސް ނެތި ދުއްވި 2138 އުޅަނދެއް ހިފަހައްޓާފައިވާކަމަށާއި އެއީ ދެ ފުރޮޅުލީ 2005 އުޅަނދު އަދި ހަތަރު ފުރޮޅުލީ 133 އުޅަނދު ކަމަށެވެ.
ފަހަކަށް އައިސް މާލެގައި ނުރައްކާތެރި އެކްސިޑެންޓުތައް ހިނގާ މިންވަރު އިތުރުވެފައިވާއިރު ފުލުހުން ވަނީ މީގެތެރެއިން ގިނަ އަދަދެއްގެ މީހުންގެ އަތުގައި ލައިސެންސްވެސް ނޯންނަ ކަމަށާއި މަގުމަތީގެ ސަލާމަތީ ފިޔަވަޅުތަކަށް ނުބަލާ ދުއްވާކަމަށް ބުނެފައެވެ.
