މާލޭ ގެއެއްގައި ރެނދުލައި އަޑިއަށް ދާތީ އެ ގެއިން މީހުން ހުސްކުރުމުގެ މަސައްކަތް މާލެ ސިޓީ ކައުންސިލުން ފަށައިފި އެވެ.
އެ ކައުންސިލުން ބުނީ ގޭގައި ރެނދުލައި މީހުން ހުސްކުރުމުގެ މަސައްކަތް ކުރަމުންދަނީ މ. ލަކީ ހެވަންއިން ކަމަށެވެ.
އެ އިމާރާތުގައި ރެނދު ލާފައި ވަނީ ޖެހިގެން ހުރި މ. ނެވިގޭޓާ އިމާރާތް ކުރަމުން ދިޔައިރު ޝީޓް ޕައިލްނުކޮށް ހުރުމުގެ ސަބަބުން ކަމަށް އެ ކައުންސިލުން ވަނީ ބުނެފައެވެ.
ހަތަރު ކޮޓަރިއެއްގައި ހަތަރު އާއިލާއެއް ދިރިއުޅެމުންދާ އެ ގެއިން 18 އަހަރުން ދަށުގެ 3 ކުދިންނާއި 6 މީހުން ދިރިއުޅޭ ކަމަށް ވެއެވެ. އަދި އަނެއް ދެ ބައިގައި ބޭރު މީހުން ދިރިއުޅޭ ކަމަށް މާލޭ ސިޓީ ކައުންސިލުން ބުނެއެވެ.
ސިޓީ ކައުންސިލުން ހިއްސާ ކޮށްފައިވާ ފޮޓޯތަކުން ފެންނަ ގޮތުގައި އެ ގޭ ބޭރު ފާރުގައި 3 ވަރަކަށް ފޫޓުގެ ބޮޑު ރެނދެއް ލާފައި ވެއެވެ. އަދި އެގޭ ތިރީގައި ފިހާރައެއް ހަދާފައިވީ ނަމަވެސް ފިހާރާގައި ވިޔަފާރި ކުރަމުން ނުދެއެވެ.
