ރަސްމީ ދަތުރުފުޅެއްގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެސްޓޯނިއާއަށް ފުރާވަޑައިގަތުމަށް ހަމަޖެހިއްޖެއެވެ.
ރައީސް އޮފީހުން ބުނީ، އެސްޓޯނިއާގެ ރައީސް ޑރ. އަލާ ކާރިސްގެ ދައުވަތަކަށް ރައީސް މުއިއްޒު މި މަހުގެ 13 ވަނަ ދުވަހުން ފެށިގެން 16 ވަނަ ދުވަހަށް އެ ގައުމަށް ވަޑައިގަތުމަށް ހަމަޖެހިފައިވާ ކަމަށެވެ.
ރައީސްގެ މި ދަތުރުފުޅުގައި ދެ ގައުމުގެ ދެމެދުގައި ގުޅުން ބަދަހިކުރުމާއި، އެކުގައި މަސައްކަތްކުރުމުގެ ފުރުސަތުތައް ހޯދުމަށް މަސައްކަތް ކުރާނެ ކަމަށް ރައީސް އެޮފީހުން ބުނެއެވެ. އެގޮތުން ޑިޖިޓަލް، ސައިބާ އަދި އީ-ގަވާނަންސް ދާއިރާއާއި، މޫސުމާއި ތިމާވެށީގެ މައްސަލަތަކާއި، ރާއްޖެއާއި އެސްޓޯނިއާއާ ދެމެދު ސައިންސާއި ތަޢުލީމީ ދާއިރާއިން ގުޅުން ބަދަހިކުރުމާ ބެހޭގޮތުން މަޝްވަރާ ކުރުމަށް ވަނީ ހަމަޖެހިފައެވެ.
އަދި ހަމައެހެންމެ އެ ގައުމުގެ ރައީސާއި ކެބިނެޓުގެ ބައެއް ވަޒީރުންނާ ވެސް ރައީސް މުއިއްޒު ބައްދަލުކުރައްވުމަށް ވަނީ ހަމަޖެހިފައެވެ.
މީގެ އިތުރުން، އެސްޓޯނިއާގެ ސިޓީއެއް ކަމަށްވާ ޓާޓޫއަށް ވެސް ރައީސް ޒިޔާރަތް ކުރައްވާނެއެވެ. އެ ސިޓީގައި ޓާޓޫގެ މޭޔަރު އުރުމަސް ކްލާސްއާ ބައްދަލުކުރެއްވުމަށް ވަނީ ހަމަޖެހިފައެވެ. ޓާޓޫ އަކީ އެސްޓޯނިއާގެ ދެވަނައަށް އެންމެ ބޮޑު ސިޓީ ކަމަށްވާއިރު، ކްލިނިކަލް މެޑިސިންގެ ދާއިރާއިން ދުނިޔޭގެ އެންމެ ބޮޑަށް ފާހަގަކުރެވޭ ޔުނިވާސިޓީތަކާއި، ސައިންޓިފިކް އިންސްޓިޓިއުޓްތަކުގެ ތެރެއިން އެންމެ މަތީ 1 އިންސައްތައަށް ނިސްބަތްވާ ޓާޓޫ ޔުނިވާސިޓީ ހުރެއެވެ.
އެ ސިޓީއަށް ކުރައްވާ ދަތުރުފުޅުގައި އެ ޔުނިވާސިޓީއާއި ޔުނިވާސިޓީގެ ރިސާޗް އެންޑް ޑިވެލޮޕްމަންޓާއި، އެސްޓޯނިއަން ޖީނޯމް ޑޭޓާބޭސް ސެންޓަރުގެ އިތުރުން، ގްރީނާޖީ ޑޭޓާ ސެންޓަރަށް ޒިޔާރަތްކުރައްވާނެއެވެ.
އެސްޓޯނިއާއަކީ ހިދުމަތްތައް ޑިޖިޓަލައިޒްކުރުމުގެ ދާއިރާއިން މިހާރު އެންމެ ބާރަށް ކުރިއަރަމުން އަންނަ އިރުމަތީ ޔޫރަޕުގެ ގައުމެއްކަން ފާހަގަކޮށްލެވެއެވެ. ރާއްޖެ އާއި އެސްޓޯނިއާއާ ދެމެދު ޑިޕްލޮމެޓިކް ގުޅުން ގާއިމުކުރީ މާޗު 22، 1994 ގަ އެވެ.
ލިސްޓުގާ މިނިކާރާއްޖެވެސް އޮންނާނެތާ.!!