އޮންލައިން ޓްރޭޑްކޮށްގެން ހޯދާ ކްރިޕްޓޯ ކަރަންސީ އެކްސްޗޭންޖް ކުރުމުގެ އެއްވެސް ހިދުމަތެއް ނުދޭ ކަމަށް ބޭންކް އޮފް މޯލްޑިވްސް ބީއެމްއެލްއިން ބުނެފިއެވެ.
ކްރިޕްޓޯ އެކްސްޗޭންޖްކުރުމުގެ ހިދުމަތް ނުދޭ ކަމަށް ބީއެމްއެލްއިން ބުނެފައި މިވަނީ އޮންލައިން ޓްރޭޑްކޮށްގެން ހޯދާ ކްރިޕްޓޯ ކަރަންސީ ބީއެމްއެލްގެ އޭޓީއެމްތަކުން އެކްސްޗޭންޖްކުރެވޭ ކަމަށް ދޭހަވާގޮތަށް ސޯޝަލް މީޑިއާގައި ވީޑިއޯއެއް ދައުރުކުރުމާ ގުޅިގެންނެވެ.
ބީއެމްއެލްއިން ބުނީ ބީއެމްއެލްގެ ކަސްޓަމަރުންނަށް ހިދުމަތް ދެމުން އަންނަ އެއްވެސް ވަސީލަތެއް މެދުވެރިކޮށް ކްރިޕްޓޯ އެކްސްޗޭންޖްކުރުމުގެ ހިދުމަތް ނުދޭ ކަމަށެވެ. ބޭންކް އޮފް މޯލްޑިވްސްގެ އޭޓީއެމްތަކުން އެމެރިކަން އެކްސްޕްރެސް، ވިސާ، މާސްޓާކާޑުގެ އިތުރުން އެހެނިހެން އިންޓަނޭޝަނަލް ބްރޭންޑްތަކުގެ ކާޑުން މުއާމަލާތް ހިންގޭނެކަން ބީއެމްއެލްއިން ވަނީ ފާހަގަކޮށްފައެވެ.
ބައިނަލްއަގްވާމީ ކާޑުތަކުން، ކަނޑައެޅިފައިވާ ލިމިޓްތަކެއްގައި ބީއެމްއެލް އޭޓީއެމް މެދުވެރިކޮށް މުއާމަލާތް ކުރެވުނު ނަމަވެސް ސޯޝަލް މީޑީއާގައި ދައުރުވި ވީޑިއޯގައި ބުނެފައިވާ ގޮތަށް އެއްވެސް ކާޑެއް ބޭނުންކޮށްގެން އެކައުންޓުން 100،000 ޑޮލަރުގެ އަދަދަށްވާ ދިވެހި ފައިސާ އެއްފަހަރާ ނުނެގޭނެ ކަމަށް ވެސް ބީއެމްއެލްއިން ވަނީ ބުނެފައެވެ.
ބޭންކުގެ އޭޓީއެމް އާއި ލޯގޯ ބޭނުންކޮށްގެން ކަސްޓަމަރުންނަށާއި އާންމުންނަށް އޮޅޭގޮތަށް ކްރިޕްޓޯ އެކްސްޗޭންޖް ކުރުމުގައި ބީއެމްއެލް އިން ޝާމިލުވެ އެކަމަށް މަގުފަހިކޮށްދޭކަމަށް ދޭހަވާ ގޮތަށް ވީޑިއޯއެއް އާންމުކޮށްފައިވާތީ ބީއެމްއެލްއިން ވަނީ އެކަން ކުށްވެރިކޮށްފައެވެ.
