އުސޫލުން ބޭރުން ވިނަރެސް ފްލެޓެއް ހޯދިކަމަށް ތުހުމަތުވި ފުލުހުންގެ އިކޮނޮމިކް ކްރައިމް އިންވެސްޓިގޭޝަންގެ ހެޑު އަދި ސުޕްރިންޓެންޑެންޓް ރަޖުނީ ޝުއައިބަށް އުސޫލުން ބޭރުން ފްލެޓް ލިބިފައިނުވާ ކަމަށް ފުލުހުން ބުނެފިއެވެ.
ކުރީ ސަރުކާރުން ހިންގި 'ބިންވެރިޔާ' ސްކީމްގެ ދަށުން ނުހައްގުން ގޯތި ދޫކުރި މައްސަލައިގެ ތަހްގީގާ ގުޅޭ ގޮތުން މިދިޔަ މަހުގެ 19 ވަނަ ދުވަހު ނޫސްވެރިންނަށް މައުލޫމާތު ދެއްވަން އިންނެވި ރަޖުނީ އާއި އޭނާގެ އަންހެނުންނަށް ނުހައްގުން ފްލެޓް ލިބުނު ކަމަށް ބުނެ، ސޯޝަލް މީޑިއާގައި ޕޯސްޓުތަކެއް ދައުރުވިއެވެ.
އެ ޕޯސްޓުތަކާ ގުޅިގެން ރަޖުނީ މަގާމުން އެކަހެރިކޮށް، އޭނާ އަށް އުސޫލުން ބޭރުން ފްލެޓް ލިބިފައިވޭތޯ ބެލުމުގެ މަސައްކަތް އޭގެ ދެ ދުވަސް ފަހުން ފެށިއެވެ. 'އެކްސް'ގައި ފުލުހުންގެ ތަރުޖަމާނު އަދި އެސިސްޓަންޓް ކޮމިޝަނަރު އަހްމަދު ޝިފާން ލިޔުއްވިގޮތުގައި:
- ތުހުމަތުތަކާ ގުޅިގެން ރަޖުނީ މަސްއޫލިއްޔަތުތަކުން އެކަހެރިކޮށް އެ މަސައްކަތް އެހެން ފުލުހަކާ ވަނީ ހަވާލުކޮށްފަ
- އެ ބަދަލު ގެނައީ 'ބިންވެރިޔާ' ސްކީމްގެ ތަހްގީގަށް ނުރަނގަޅު އަސަރެއް ނުފޯރާނެ ކަން ޔަގީންކުރުމުގެ ގޮތުން
ފުލުހުން މިއަދު ބުނީ، ރަޖުނީ އަށް ފްލެޓެއް ލިބުމުގައި އެއްވެސް އުސޫލަކާ ހިލާފު އަމަލެއް ހިނގާފައިވޭތޯ ކަމާބެހޭ އިދާރާތަކުން ހިއްސާކުރި މައުލޫމާތުތައް ދިރާސާކޮށް ބެލިބެލުމުން އެފަދަ ކަމެއް ފާހަގަކުރެވިފައިނުވާ ކަމަށެވެ.
