ތިނަދޫ ސިޓީ ކައުންސިލަކަށް, ބަދަލު ނުވަނީސް މޭޔަރާއި ކައުންސިލަރުން، ސިޓީއެއްގެ ދަރަޖައިގައި ހިމެނޭ މުސާރަ ނެގިކަމަށް ބުނާ މައްސަލައެއް ލޯކަލް ގަވަމެންޓް އޮތޯރެޓީ އެލްޖީއޭއަށް ހުށަހަޅައިފިއެވެ.
ގާނޫނުތަކާއި ހިލާފަށް ދައުލަތުގެ މަގާމު ނަހަމަ ގޮތުގައި ބޭނުންކުރުމާއި މާލީ މަންފާއެއް ހޯދުމުގެ އަމަލެއްކަމަށް ބުނެ މި މައްސަލަ އެލްޖީއޭ އަށް ހުށަހަޅާފައިވަނީ އެންވަޔަރަމަންޓް މިނިސްޓްރީގެ ކުރީގެ ނައިބު އަދި ގާނޫނީ ވަކީލް އަހްމަދު ރާގިބެވެ.
އެލްޖީއޭއިން ރަގީބު ހުށަހެޅި މައްސަލައިގެ ޖަވާބުގައި ބުނެފައިވަނީ އޭނާ ފާހަގަކުރި ކަންކަަމަކީ ކޮރަޕްޝަންގެ އަމަލެއްކަމަށް ތުހުމަތުކުރެވޭ ކަންކަންކަމަށެވެ. އަދި އެ މައްސަލަ އެންޓި ކޮރަޕްޝަން ކޮމިޝަން (އޭސީސީ) އަށް ހުށަހަައިފިނަމަ އެ ކޮމިޝަނުން ތަހުގީގު ކުރާނެކަމަށްވެސް އެލްޖީއޭގެ ސިޓީގައި ބުނެފައިވެއެވެ. އެހެންކަމުން އެލްޖީއޭއިން ވަނީ އެ މައްސަލަ ފުލުހަށް އަދި އެންޓި ކޮރަޕްޝަން ކޮމިޝަނަށް ހުށަހެޅުމަށް އެދިފައެވެ.
ގދ. ތިނަދޫގެ އާބާދީގައި 10،000 މީހުން ހަމަނުވާ ކަމަށާއި، އެ ކަން ކޮށްފައި ވަނީ އޮޅުވައިލައިގެންކަމަށް ބުނެ، އެ މައްސަލަވެސް ރަގީބުވަނީ ހައި ކޯޓަށް ހުށަހަޅާފައެވެ. އެހެންނަމެވެސް އޭނާ ހުށަހެޅި ދުސްތޫރީ މައްސަލަ ބަލައިގަނެވެން ނެތްކަމަށް ހައިކޯޓުން ވަނީ ނިންމާފައެވެ.
