މި އަހަރުގެ ރޯދަމަހާ ދިމާކޮށް އުރީދޫ މޯލްޑިވްސް އިން ހުޅުމާލޭގެ މަސްޖިދުލް ޝައިހް ގާސިމް ބިން އަލް ޘާނީ މިސްކިތަށް ބޭނުންވާ އޭސީ ހަދިޔާކޮށްފިއެވެ.
އުރީދޫ އިން ބުނީ މިކަން ކުރެވިފައިވަނީ ކުރިއަށް އޮތް ރޯދަ މަހަށް މިސްކިތް ތައްޔާރު ކުރުމުގެ ގޮތުން ކަމަށާއި، އޭސީ ހަދިޔާ ކުރެވިފައި ވަނީ ގަތަރް ޗެރިޓީ ގްލޯބަލް އާއި ގުޅިގެން ކަމަށެވެ.
ގަތަރް ޗެރިޓީ ގްލޯބަލް އަކީ 1994 ވަނަ އުފެދުނު އެންޖީއޯ އެކެވެ. މި އެންޖީއޯ 500 ރީޖަނަލް ޕާޓްނަރުންނާއެކު ދުނިޔޭގެ އެކި ކަންކޮޅުތަކުގެ 70 ގައުމެއްގައި ދަނީ ހަރަކާތްތެރި ވަމުންނެވެ.
އުރީދޫ އިން ބުނީ އުރީދޫ އިން އަބަދުވެސް މަސައްކަތް ކުރަމުންދަނީ މުޖުތަމައަށް ފައިދާ ހުރި ކަންކަން ފޯރުކޮށްދިނުމަށްކަމަށާއި، އުރީދޫއިން އަބަދުވެސް އެގޮތުގައި ދެމިތިބޭނެ ކަމަށެވެ.
ފާހަގަކޮށްލެވޭ ގޮތުގައި އުރީދޫއިން އަބަދުވެސް އުރީދޫގެ ކަސްޓަމަރުންނަށް ރޯދަ މަހާ ދިމާކޮށް ހާއްސަ އޮފާތައް ތާރަފް ކުރެއެވެ. އެގޮތުން ނިމިދިޔަ އަހަރުތަކުގައިވެސް އުރީދޫ އިން ވަނީ ވައިބާ އާ ގުޅިގެން އެ ކުނފުނިން ނަމާދު ވަގުތު އަންގައިދޭ، "ބަންގި ޗެނަލް" އިން ނަމާދު ވަގުތުގެ ހަނދުމަކޮށްދިނުމުގެ އިތުރުން ޤިބްލަ ހޯދައި، ޒަކާތް ހިސާބުކޮށް، ނަމާދުގެ ތާވަލުތައް ބަލާލުން ފަދަ މުހިއްމު އަދި ފަސޭހަ ހިދުމަތްތަކެއް ލިބޭނެ އިންތިޒާމް ހަމަޖައްސައިދީފައެވެ.
މީގެއިތުރުން އުރީދޫ އިން ވަނީ ރޯދަމަހާ ދިމާކޮށް ހާއްސަ ޑޭޓާ ޕެކޭޖުތަކެއްވެސް ކުރީ އަހަރުތަކުގައި ފޯރުކޮށްދީފައެވެ. އެގޮތުން އުރީދޫގެ 4ޖީ+ ނެޓްވޯކުގައި ބޭނުންކޮށްލަން 1ޖީބީ ޑޭޓާ، އަދި ގާތްތިމާގެ މީހުންނަށް ގުޅާލަން 100 މިނިޓް ލިބޭ 25 ރުފިޔާގެ ޕެކޭޖެއް ތާރަފްކޮށްފައެވެ.
އުރީދޫ އިން މި އަހަރުގެ ރޯދަ މަހާ ދިމާކޮށްވެސް ހާއްސަ ޑޭޓާ ޕެކޭޖުތަކާ އޮފާތައް ތާރަފްކުރުމަށް ވަނީ ނިންމާފައެވެ.
