ގދ. ހޯނޑެއްދޫގެ ރަށްގިރުމާއި އުދައެރުމުގެ މައްސަލައަށް މި އަހަރު ބަޖެޓުގެ ތެރެއިން ދާއިމީ ހައްލެއް ހޯދައިދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވެފައި ވަނީ އެމަނިކުފާނު ހުވަދުއަތޮޅަށް މިއަދު ފެެއްޓެވި ދަތުރުފުޅުގެތެރެއިން ގދ.ހޯނޑެއްދޫގެ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުންނެވެ.
އެގޮތުން ރައީސް ވިދާޅުވީ މި އަހަރު ވެގެންދާނީ ރަށްރަށަށް ވެވަޑައިގެންފައިވާ ވައުދުތަކާއި މެނިފެސްޓޯގައި ހިމަނުއްވާފައިހުރި ވައުދުތައް ފުއްދެވުމުގެ އަމަލީ މަސައްކަތް ކުރެވިގެންދާ އަހަރަކަށް ކަމަށެވެ. އެއާއެކު ހޯނޑެއްދޫގެ ރަށްގިރުމާއި އުދައެރުމުގެ މައްސަލައަށް މި އަހަރު ބަޖެޓުގެ ތެރެއިން ދާއިމީ ހައްލެއް ހޯދައިދެއްވާނެކަށާއި، ތައުލީމާއި ސިއްހީ ދާއިރާ ކުރިއެރުވުމަށާއި އަދި ކުޅިވަރުގެ އެކި ވަސީލަތްތައް ގާއިމުކުރުމަށްވެސް މަސައްކަތް ކުރައްވާނެކަމަށް ރައީސް ވަނީ ވިދާޅުވެފައެވެ.
ރައީސް އިތުރަށް ވިދާޅުވީ ކައުންސިލްތަކަށް އާމްދަނީ ހޯދައިދިނުމަށް ރަށާ ކައިރި ފަޅުރަށްތަކުގައި އިންޓަ ގްރޭޓެޑް ޓޫރިޒަމް ހިންގޭނެ ގޮތަށް ހަމަޖެއްސެވުމަށް މަސައްކަތް ކޮށްދެއްވާނެކަމަށެވެ. އަދި ޕީއެސްއައިޕީ މަޝްރޫތަކުގެ ތެރެއިން ގެދޮރުވެރިކަން، އަދި ތައުލީމަށްފަހު މަގުހެދުމަށް އިސްކަން ދެއްވާނެކަމަށާއި، ހޯނޑެއްދޫ މަގުހެދުމަށް ވެވަޑައިގެންނެވި ވައުދު މިއަހަރާ މިއަންނަ އަހަރު ފުއްދަވާނެކަމަށްވެސް ރައީސް ވަނީ ވިދާޅުވެފައެވެ.
މީގެއިތުރުން މިއަދު ރައީސް ވަނީ ހޯނޑެއްދޫ ރައްޔިތުންނާ ބައްދަލުކޮށްލެއްވުމުގެ ތެރެއިން އެރަށުގެ ފެނާ ނަރުދަމާ ނިޒާމުގެ މަޝްރޫ ރަސްމީކޮށް އިފްތިތާހު ކޮށްދެއްވާފައެވެ.
