ގދ. ހޯނޑެއްދޫގައި ގާއިމްކުރި ފެނާއި ނަރުދަމާ ނިޒާމު މިއަދު އިފްތިތާހުކޮށްފި އެވެ.
މި މަޝްރޫއު ރައީސް އިފްތިތާހްކޮށްދެއްވީއެމަނިކުފާނު ހުވަދުއަތޮޅަށް މިއަދު ފެެއްޓެވި ދަތުރުފުޅުގައި އެ ރަށަށް ވަޑައިގެންނެވެ.
އެގްޒިމް ބޭންކް އޮފް އިންޑިއާގެ ލައިން އޮފް ކްރެޑިޓްގެ ދަށުން 34 ރަށެއްގައި ފެނާއި ނަރުދަމާ ނިޒާމް ގާއިމުކުރުމުގެ މަޝްރޫއުގެ ތެރެއިން، މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗާއިން ޓްރެވެނީ އިންޖިނިއަރިން އެންޑް އިންޑަސްޓްރީސް ލިމިޓެޑާ ހަވާލުކޮށްގެން ނިންމާފައިވާ މަޝްރޫއެކެވެ.
ހޯނޑެއްދޫގައި ފެނާއި ނަރުދަމާގެ ހިދުމަތް ގާއިމްކުރުމުގެ އަމަލީ މަސައްކަތް ފަށާފައިވަނީ 2022 ވަނަ އަހަރުގެ ޖޫން މަހުގެ 13 ވަނަ ދުވަހުއެވެ.
އެ ރަށުގައި ނަރުދަމާގެ ފަސް ޕަމްޕު ސްޓޭޝަން ގާއިމްކުރުމާއި ސީ އައުޓް ފޯލް އެޅުމާއި މުޅި ރަށުގައި ފެނާއި ނަރުދަމާ ނިޒާމުގެ ވިއުގަ އެޅުމާއި ދުވާލަކު 75 ޓަނުގެ ފެން އުފެއްދޭ ވަރުގެ ދެ އާރުއޯ ޕްލާންޓު ވަނީ ބަހައްޓާފައެވެ. އޭގެ އިތުރުން ފެން ރައްކާކުރުމަށް ދެ ޓޭންކު ބަހައްޓައި ގޭގެއަށް ފެނާއި ނަރުދަމާގެ ކަނެކްޝަން ގުޅާފައިވެ އެވެ.
މި މަޝްރޫއުއާއެކު އެ ރަށުގެ ރައްޔިތުންނަށް ދިމާވަމުންދިޔަ އެންމެ ބޮޑު އެއް މައްސަލަ ކަމުގައިވާ ވިއްސާރަ މޫސުމުގައި ޖަކްޝަންތަކަށް ދިމާވަމުންދިޔަ މައްސަލަތަކަށް ހައްލެއް ލިބިގެންދާނެ ކަމަށް ވެއެވެ.
