ގައުމީ އެއާލައިން، މޯލްޑިވިއަންގެ ދެވަނަ ވައިޑް ބޮޑީ އެއާކްރާފްޓް މިއަހަރުގެ އޮކްޓޫބަރުގައި އުދުހެން ފަށާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވެފައި ވަނީ ވައިޓް ބޮޑީ އެއާކްރާފްޓް އޮޕަރޭޝަން އިފްތިތާހު ކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ. އެގޮތުން ރައީސް ވިދާޅުވީ ވައިޑް ބޮޑީ އެއާކްރާފްޓުގެ ދެ ފްލައިޓު ގެނައުމަކީ އެ މަނިކުފާނުފެ ރިޔާސީ ވައުދުފުޅެއްކަމަށާއި، އޭގެ ފުރަތަމަ ފްލައިޓު މިއަދު ވެލާނާ އެއާޕޯޓުގައި ޖައްސާނެ ކަމަށެވެ.
ރައީސް ވިދާޅުވީ މި ބޯޓާއެކު ފަތުރުވެރިކަމުގެ ދާއިރާއަށް ވަރަށް ބޮޑު ކުރިއެރުމެއް ލިބިގެންދާނެ ކަމަށާއި، މިއީ އަދި ފެށުމެއް ކަމަށެވެ. ރައީސް ވިދާޅުވީ ކުރިއަށް އޮތް ދުވަސްތަކުގައި އައިލެންޑް އޭވިއޭޝަން އަދި އެމްއޭސީއެލް އަށް އިތުރު ކުރިއެރުން ގެނެސް ކުޑަ ދުވަސްކޮޅެއްގެ ތެރޭގައި ކުރި އެރުންތަކެއް ގެންނާނެ ކަމަށެވެ. ރައީސް ވިދާޅުވީ 2025 ވަނަ އަހަރަކީ ތަރައްގީގެ އަހަރު އަމަލީ ގޮތުން ފެންނާނެ އަހަރު ކަމަށެވެ.
މޯލްޑިވިއަންގެ ފުރަތަމަ ވައިޑް ބޮޑީ އެއާކްރާފްޓް ގެނައުމަށް މިއަދު ހަވީރު ބާއްވާ އެއާކްރާފްޓް ޝޯ ބައްލަވާލެއްވުމަށް ރައީސްގެ ދެކަނބަލުންނާއި، ނައިބު ރައީސް އަދި މަޖިލީހުގެ ރައީސްގެ އިތުރުން ދައުލަތުގެ ވަޒީރުން ވަނީ ވަޑައިގެންފައެވެ.
ދުރު މަންޒިލްތަކަށް ސީދާ ދަތުރު ކުރެވޭ ގޮތަށް ފަރުމާކޮށްފައިވާ ވައިޑް ބޮޑީ އެއާކްރާފްޓަކީ 275 ފަސިންޖަރުންގެ ޖާގައިގެ ބޯޓެކެވެ.
ގައުމީ އެއާލައިންގެ އޮޕަރޭޝަންތައް ފުޅާކުރުމަށް ވައިޑް ބޮޑީ މަތިންދާބޯޓެއް ގެނައުމުގެ އެއްބަސްވުމުގައި މިދިޔަ އަހަރު ޖުލައި މަހުގެ 26 ވަނަ ދުވަހު ސޮއިކޮށްފައިވާއިރު ރާއްޖެއަށް ގެނައުމަށް ހަމަޖެހިފައިވަނީ އެއާބަސް އޭ 330-200ގެ ވައިޑް-ބޮޑީ މަތިންދާބޯޓުތަކެވެ.
މި މަތިންދާ ބޯޓުތަކުގައި ސީދާ 13،000 ކިލޯމީޓަރުގެ ދުރުމިނެއް ދަތުރުކުރުމުގެ ގާބިލްކަން ލިބިފައިވާއިރު މިއީ ހަނި ބޮޑީ މަތިންދާ ބޯޓަކަށްވުރެ ތިންގުނަ ބޮޑު މަތިންދާ ބޯޓެކެވެ.
