އިންޑިއާގެ ހުޅަނގު ދެކުނު ސަރަހައްދުގެ އަވަށެއް ކަމަށްވާ ކަރްނާޓަކާ އިން ހިއުމަން މެޓަނިއުމޯވައިރަސް (އެޗްއެމްޕީވީ)ގެ ދެ ކޭސް އެއް ފެނިފައިވާ ކަމަށް އެ ގައުމުގެ ހެލްތް މިނިސްޓްރީން ބުނެފިއެވެ.
މިދިޔަ ނޮވެމްބަރު މަހުގެ ދެވަނަ ހަފްތާ އިން ފެށިގެން ޗައިނާގައި ފެތުރެމުންދާ ހިއުމަން މެޓަނިއުމޯވައިރަސް ބަލި އިންޑިއާގައި ވެސް ހަލުވި ކަމާއެކު ފެތުރެމުންދާ ކަމަށް މީގެ ކުރިން އަޑު ފެތުރިފައި ވެއެވެ. އެކަމާ ގުޅިގެން އިންޑިއާގެ ހެލްތް މިނިސްޓްރީން މިއަދު ނެރުނު ބަޔާނެއްގައި ވަނީ ކަރްނާޓަކާ އިން އެ ބަލީގެ ދެ ކޭސް ފެނިފައިވާކަން އިއުލާންކޮށްފައެވެ.
އެ ދެ ކޭސްވެސް ދެނެގަނެފައި ވަނީ ނޭވާލާ ނިޒާމަށް ޖެހޭ ބަލިތައް މޮނިޓާ ކުރުމަށް އައިސީއެމްއާރުން ކުރަމުންދާ މަސައްކަތުގެ ތެރެއިން ހިންގަމުންދާ ރޫޓިން ސަވައިލެންސްގެ ތެރެއިން ކަމަށް އެ ގައުމުގެ ހެލްތް މިނިސްޓްރީން ވަނީ ބުނެފައެވެ. މި ދެ ކޭސް ފެނިފައި ވަނީ 8 މަހުގެ ކުއްޖެއްގެ އިތުރުން 3 މަހުގެ ތުއްތު ކުއްޖެއްގެ ގައިންނެވެ. އަދި ބަލި ފެނިފައިވާ ދެ ކުދިންނަކީ ބައިނަލްއަގްވާމީ ދަތުރުފަތުރު ކޮށްފައިވާ ފަރާތްތަކެއް ނޫން ކަމަށް ވެސް އެ ގައުމުން މައުލޫމާތު ދެއެވެ.
އަދި ހަމައެހެންމެ ބަލި ފެތުރެމުންދާ ހާލަތު ބަލަމުންދާކަން ފާހަގަކޮށް އިންޑިއާގެ ހެލްތް މިނިސްޓްރީން ބުނީ އެފަދަ ބަލިތައް އިތުރުވެއްޖެ ހާލަތެއްގައި އެކަމާ ކުރިމަތިލުމުގެ ގާބިލުކަން އެގައުމަށް ލިބިފައިވާ ކަމަށެވެ.
ޗައިނާގެ އުތުރުގެ 14 ޕްރޮވިންސެއްގައި ފެތުރެމުންދާ މި ބައްޔާ ގުޅިގެން ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ވަނީ ނޭވާލާ ނިޒާމުގެ ބަލިތައް ރާއްޖޭގައި އިތުރުވާނެ ކަމަށް ލަފާކޮށް ބައެއް ކަންކަމަށް ސަމާލުވާން އަންގާފައެވެ.
އެޗްޕީއޭއިން ބުނީ ފިނި މޫސުމާ ދިމާކޮށް އެހެން ގައުމުތަކުގައި ވެސް ނޭވާލާ ނިޒާމުގެ ބަލިތައް ފެންނަ މިންވަރު އިތުރު ކަމަށެވެ. އެގޮތުން އެންމެ ބޮޑަށް ފެތުރެނީ އިންފްލުއެންޒާ ކަމަށާއި، އޭގެ އިތުރުން އާރުއެސްވީ، ރައިނޯވައިރަސް، އެޑިނޯވައިރަސް މައިކޯޕްލާސްމާ، ނިއުމޯނިއާ އަދި ހިއުމަން މެޓަނިއުމޯވައިރަސް ފެތުރެމުން ދާ ކަމަށާއި، އެއީ އާންމުކޮށް ވެސް ދައުރުވާ ނޭވާލާ ނިޒާމުގެ ބަލިތައް ކަމަށް އެޗްޕީއޭއިން ބުންޏެވެ.
ނަމަވެސް ނޭވާ ހިއްލުން ފަދަ ނޭވާލާ ނިޒާމުގެ ބަލިތައް ތަހައްމަލުކުރަމުންދާ މީހުންނާއި ދިފާއީ ބާރު ބަލިކަށި މީހުންނާއި މާބަނޑު އަންހެނުންނާއި އުމުރުން ދުވަސްވީ މީހުންނާއި ކުޑަކުދިން ބަލީގައި ބޮޑުވަރު ނުވި ނަމަވެސް އަވަހަށް ސިއްހީ ފަރުވާ ހޯދަން އެޗްޕީއޭ އިން އިލްތިމާސްކުރެއެވެ.
