މާލެއަށް ވެހުނު ބޯ ވާރޭގައި ފެން ބޮޑުވުމާ ގުޅިގެން އާންމު ދަތުރުފަތުރަށް ބާރު ބޮޑުވެފައިވާތީ ބައެއް ބަސްތަކުގެ ދަތުރުފަތުރު މިރޭ ދަންވަރު 1 ޖަހަންދެން ދަންމާލައިފިއެވެ.
އުމްރާ އަށް ދިޔަ މީހުންގެ ތެރެއިން ފުރަތަމަ ގްރޫޕު އެނބުރި އައުމާއި ބޮޑު ޗުއްޓީއަށް ފަހު ފުރާ މީހުންނާއި އަންނަ މީހުން ގިނަވެ، އެއާޕޯޓު މިއަދު ވަނީ ތޮށްޖެހިފައެވެ. އަދި މާލެ އަށް ކުރި ވިއްސާރަޔާ ގުޅިގެން ދަތުރުފަތުރަށް ބުރޫ އަރާފައިވާ ކަން ވެސް ފާހަގަކުރެވެއެވެ.
އެމްޓީސީސީން ބުނީ، މިއަދަކީ ޓްރެފިކް ބާރުބޮޑު ދުވަހަކަށް ވެފައި އަދި މޫސުން ވެސް ގޯސް ދުވަހަކަށް ވުމާ އެކު، ގިނަ ބަޔަކު އެއާޕޯޓުގައި ތާށިވެފައި އެބަތިބި ކަމަށާއި، އެހެންކަމުން ކަސްޓަމަރުންނަށް ފަސޭހަކުރުމުގެ ގޮތުން މިރޭ 1 ޖަހަންދެން R3 R4 R9 ގެ ބަސްތައް ދަތުރުކުރަން ހަމަޖެހިފައިވާ ކަމަށެވެ.
މިހާރު ކުރަމުންދާ ވިއްސާރައާ ގުޅިގެން މާލޭގައި ރެކޯޑު އަދަދަކަށް ފެން ބޮޑުވެ، ފިހާރަތަކަށާއި ގޭބިސީތަކަށް ފެން ވަދެފައިވެއެވެ. އަދި ފެން ވަނުމުގެ ސަބަބުން ބައެއް ވިޔަފާރިތަކަށް އެކިވަރުގެ ގެއްލުން ވެފައިވެއެވެ.
