މެދު ރާއްޖެތެރޭގެ ރަށްރަށަށް ގުގުރުމާ އެކު ބޯކޮށް ވާރޭ ވެހޭނެ ކަމަށް ލަފާކޮށް ރީނދޫ އެލާޓް ނެރުމަށް ފަހު ކުޑަ ވަގުތުކޮޅެއްގެ ތެރޭގައި އޮރެންޖް އެލާޓަށް މަތިކޮށްފިއެވެ.
މޫސުމާ ބެހޭ ގައުމީ އިދާރާ އިން މިއަދު އެންމެ ފުރަތަމަ ވަނީ ގުގުރުމާ އެކު ބޯކޮށް ވާރޭ ވެހި، ވިލާގަނޑުގައި ގަޑިޔަކު 45 މޭލަށް ވައި ގަދަވާނެ ކަމަށް ލަފާކޮށް، މެންދުރުފަހު 3 އިން ރޭގަނޑު 7 އަށް ރީނދޫ އެލާޓް ނެރެފައެވެ.
ނަމަވެސް އޭގެ އަށް މިނެޓު ފަހުން، ގުގުރުމާ އެކު ބޯކޮށް ވާރޭ ވެހި ފެން ބޮޑުވާނެ ކަމަށް ލަފާކޮށް ބ. އަތޮޅުން ފެށިގެން ތ. އަތޮޅަށް ނެރުނު ރީނދޫ އެލާޓް ވަނީ އޮރެންޖް އެލާޓަށް މަތިކޮށްފައެވެ.
ރާއްޖެއަށް މިހާރު ކުރަމުންދާ ވިއްސާރައިގައި ބައެއް ރަށްރަށަށް އާދަޔާ ހިލާފަށް އުދަ އަރައި އެ ރަށްރަށުގެ ބޮޑު ސަރަހައްދެއްގައި ފެންބޮޑުވެފައި ވެއެވެ. ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނީ އޭގެ ތެރެއިން ބައެއް ރަށްރަށުގައި ފެން ހިންދުމުގެ މަސައްކަތް ސިފައިން ކުރަމުންދާ ކަމަށެވެ.
މޫސުން ގޯސްވުމުގެ ސަބަބުން ލިބިދާނެ ގެއްލުންތައް ކުޑަކުރުމަށްޓަކައި ކުރެވިދާނެ ކަންކަން ކުރުމަށް ކަމާބެހޭ ފަރާތްތަކުން އިލްތިމާސްކުރެއެވެ.
