މިއަހަރުގެ ފުރަތަމަ ޓޫރިސްޓަށް ވެލާނާ އިންޓަނޭޝަނަލް އެއާޕޯޓުން ހޫނު މަރުހަބާއެއް ކިޔައިފިއެވެ.
ވެލާނާ އެއާޕޯޓުން އެކްސްގައި ކުރި ޕޯސްޓެއްގައި ބުނެފައިވަނީ 2025 ވަނަ އަހަރުގެ ފުރަތަމަ ޓޫރިސްޓަކީ ލުއިސް ނަމަކަށް ކިޔުނު މީހެއްކަމަށާއި އޭނާ ރާއްޖެ އައި މިއީ 11 ވަނަ ފަހަރު ކަމަށެވެ. އޭނާ ރާއްޖެ އައިސްފައިވަނީ އަންހެނުންގެ އިތުރުން ދަރިފުޅުވެސް ގޮވައިންނެވެ.
މި އާއިލާގެ ހިތުގައި ރާއްޖެއާމެދު ހާއްސަ ލޮތްބެއް އުފެދިފައިވާކަމަށާއި، ރާއްޖޭގެ ގޮނޑުދޮށާއި މީހުންނަށް އޮތް ލޯތްބާ އެކު އެމީހުންނަށް ރާއްޖެއަކީ އާއިލާއެއް ކަހަލަ ތަނެއްކަމަށް ވެލާނާ އެއާޕޯޓުގެ ޕޯސްޓުގައި ވަނީ ބުނެފައެވެ.
މިއާއެކު ވެލާނާ އެއާޕޯޓުން ބުނީ މި އާއިލާ އަކީ ހަމައެކަނި ރާއްޖެ ޒިޔާރާތްކޮށްލި ޓޫރިސްޓުންތަކެއް ނޫންކަމަށާއި އެމީހުންނަކީ ހަގީގަތުގައިވެސް ދިވެހި އާއިލާއެއް ފަދަ ބައެއް ކަމަށެވެ.
ވެލާނާ އެއާޕޯޓުން ވަނީ ރާއްޖެ އަކީ އެމީހުންގެ ދެވަނަ ގެއަކަށް ހެދުމުން އެކަމަށް ޝުކުރު އަދާކޮށް ފާގަތި އާ އަހަރަކަށް އެދިފައެވެ.
ފާހަގަކޮށްލެވޭ ގޮތުގައި ކޮންމެ އަހަރަކުވެސް ކްރިސްމަސްއާއި ނިއު އިޔާއާ ދިމާކޮށް ގިނަ އަދަދެއްގެ ޓޫރިސްޓުން ރާއްޖެ ޒިޔާރަތް ކުރެއެވެ. އެގޮތުން ނިމިދޔަ ޑިސެމްބަރު މަހު ވަނީ 3054 ފަތުރުވެރިންނާއެކު ދެ ކްރޫޒް ޝިޕް މާލެއަށް ބަނދަރު ކޮށްފައެވެ.
މާލޭގައި ބަނދަރުކޮށްފައިވާ 2 ކްރޫޒްގެ ތެރެއިން، ފުރަތަމަ ކްރޫޒް ޝިޕް އެމްއެސް ނޯވީޖިއަން ސްކައި ރާއްޖެ އައީ މިދިޔަ އާދިއްތަ ދުވަހުގެ ހެނދުނެވެ. މި ކްރޫޒްގައި ރާއްޖެއަށް 1872 ފަތުރުވެރިން އައިސްފައިވާ އިރު، ދެވަނައަށް އައި ކްރޫޒް ޝިޕް، އެމްއެސް ރިވިއޭރާ މާލެއަށް ބަނދަރުކޮށްފައި ވަނީ ހޯމަ ދުވަހުގެ ހެނދުނެވެ. އެ ކްރޫޒްގައި ޖުމްލަ 1182 ފަތުރުވެރިން ރާއްޖެ އައިސްފައި ވެއެވެ.
މީގެއިތުރުން ޖެނުއަރީ މަހު އިތުރު އެއް ކްރޫޒް ޝިޕް އައުމަށް ހަމަޖެހިފައިވާ ކަމަށާއި ހައި ސީޒަން ނިމުމުގެ ކުރިން އިތުރު 12 ކްރޫޒް ޝިޕް ރާއްޖެ އައުމަށް ތާވަލްކޮށްފައިވާ ކަމަށް މޯލްޑިވްސް އެސޯސިއޭޝަން ފޯ ޔޮޓް އޭޖެންޓްސް (މާޔާ) އިން ވަނީ ބުނެފައެވެ.
