މި ފެށުނު 2025 ވަނަ އަހަރު ވާނީ ތިޔާގި، ގައުމު ބިނާކުރުމުގެ އަހަރަކަށް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އާ އަހަރުގެ މުނާސަބަތުގައި ފޮނުއްވި ހިތާބުގައި ރައީސް ވިދާޅުވީ، މި ފެށުނު 2025 ވަނަ އަހަރާ ރާއްޖެ ބައްދަލުކުރަނީ އުންމީދުތަކާއި ތަރައްގީގެ ތަސައްވުރުތަކާ އެކު ކަމަށެވެ.
ރައީސް ވިދާޅުވީ ރާއްޖޭގެ މިއަދުގެ އަމާޒަކީ ބޯހިޔާވަހިކަމާއި ބޭސްފަރުވާ އާއި އަސާސީ ހިދުމަތްތައް ޒަމާނީ ފެންވަރަށް ތަރައްގީކުރުމާއި، ރާއްޖޭގެ މިނިވަންކަމާއި ގައުމިއްޔަތު ދިފާއުކުރުމާއި، ރާއްޖޭގެ އެކި ސަރަހައްދުތަކަށް އުމްރާނީ ތަރައްގީ ގެނެސް ތަރައްގީވެފައިވާ ގައުމުތަކުގެ ސަފަށް ރާއްޖެ ހިޖުރަކުރުން ކަމަށެވެ.
"2025 ވަނަ އަހަރު ހިމެނިގެންދާނީ މި ކަންކަމުގެ އަމަލީ މަސައްކަތްތަކުގެ އަހަރުގެ ގޮތުގައެވެ. އެގޮތުން ރާއްޖޭގެ އެކި ކަންކޮޅުތަކުގައި ތަރައްގީގެ އެކި މަޝްރޫއުތައް ފެށޭނެއެވެ. ނަތީޖާއަކަށް ވާނީ، އިގްތިސާދީ ފުދުންތެރިކަން އިއާދަ ވާން ފެށުމެވެ. މަސައްކަތްތެރީންނަށް ފުރުސަތުތައް ހުޅުވިގެން ދިއުމެވެ. އެއާއެކު އާންމު ތިޔާގިކަމެއް މުޅި ގައުމަށް ލިބެން ފަށާނެއެވެ." އެމަނިކުފާނުގެ ހިތާބުގައި ވެއެވެ.
މި އަހަރު ސަރުކާރުގެ އަޒުމަކީ ރައީސް ވިދާޅުވި ގޮތުގައި:
- އާންމުންނަށް ހިދުމަތްކުރުމުގައި ދެމިއޮތުން
- ވައުދުތައް ފުއްދައި އާންމުންގެ މެދުގައި އިތުބާރު ދެމެހެއްޓުން
- އާންމުންގެ ޝަކުވާތަކަށާއި މައްސަލަތަކަށް ދާއިމީ ހައްލު ހޯދައިދިނުން
އެއާއެކު އާންމުންގެ ކިބައިން އެމަނިކުފާނު ވަނީ ހެޔޮ ވިސްނުމާއި ސުލްހަ މަސަލަސްކަން އިސްކޮށް، ސަރުކާރުން ރަނގަޅުކުރަން ޖެހޭ ކަންކަމަށް ރަނގަޅުގޮތުގައި މަގު ދައްކަދިދިނުމަށް އެދިވަޑައިގެންފައެވެ.
"އިރާދަކުރެއްވިއްޔާ 2025 ވަނަ އަހަރަކީ ތިޔާގިކަމުގެ އަހަރެވެ. މަޝްރޫއުތަކުގެ އަމަލީ މަސައްކަތުގެ އަހަރެވެ. އެންމެން ގުޅިގެން ގައުމީ ތަރައްގީގައި އެއް އަމާޒަކަށް ދަތުރުކުރުމުގެ އަހަރެވެ. ދިވެހީންގެ ރާއްޖޭގެ އަންނަން އޮތް މުސްތަގުބަލަށްޓަކައި ޒިންމާދާރުކަމާ އެކީ ގައުމު ބިނާކުރުމުގެ އަހަރެވެ." ރައީސް ވިދާޅުވިއެވެ.
