މިފްކޯއަށް މަސްކިރަމުން އަންނަ ދޯނިތަކަށް ދޭން ޖެހޭ ފައިސާގެ ތެރެއިން މި މަހުގެ 29 ވަނަ ދުވަހު މަސްކިރާފައިވާ ދޯނިތަކަށް ދޭންޖެހޭ 3،751،711 ރުފިޔާ ޖަމާކޮށްފައިވާ ކަމަށް ބުނެފިއެވެ.
މިފްކޯއިން ބުނީ، މިއަދު އެ ކުންފުނިން ބީއެމްއެލްއަށް ފޮނުވި 307 މެޓްރިކް ޓަނުގެ މަހުގެ ފައިސާ މަސްކިރި ދޯނިތަކުގެ އެކައުންޓްތަކަށް މިހާރު ޖަމާވެފައިވާ ކަމަށެވެ. މިއީ މި މަހުގެ 29 ވަނަ ދުވަހު ކިރާފައިވާ މަހުގެ އަގު ކަމަށް ވެސް މިފްކޯއިން ބުނެއެވެ.
އިއްޔެގެ ވަގުތެއްގައި މިފްކޯއިން ވަނީ މި މަހުގެ 28 ވަނަ ދުވހު މިފްކޯއަށް ކިރާފައިވާ 203 މެޓްރިކް ޓަނުގެ މަހަށް ވާ 2،337،608 ރުފިޔާ ބީއެމްއެލްއަށް ފޮނުވާފައެވެ. އަދި އެ ފައިސާ މިއަދު ހެނދުނު ޖަމާވެފައިވާ ކަމަށް މިފްކޯއިން ބުނެއެވެ.
މިހާރު މަސްވެރިންނަށް ނުދެއްކި ބާކީ ހުރި ފައިސާގެ އަދަދަކީ މި މަހުގެ 30 ވަނަ ދުވަހު ކިރާފައިވާ މަހަށް ވާ 4،287،258 ރުފިޔާ ކަމަށް ވެސް މިފްކޯއިން ބުނެއެވެ.
ކުރީ ސަރުކާރު ނިމުނު އިރު، މަސްވެރިންނަށް ފައިސާ ނުދީ، 250 މިލިއަނެއްހާ ރުފިޔާގެ ބެކްލޮގެއް އޮތް އިރު ރައީސް ޑރ. މުހައްމަދު މުއިއްޒުގެ ސަރުކާރުން ވަނީ އެ ފައިސާއާ އެކުގައި މިހާތަނަށް އައިއިރު، މަސްވެރިންނަށް ވަނީ 987،215،704 ރުފިޔާ ދީފައެވެ. މީގެ ކުރިން މަސްވެރިންނަށް ދޭންޖެހޭ ފައިސާ ނުދިނުމުގެ ސަބަބުން މުޒާހަރާ ކޮށްފައިވާއިރު ސަރުކާރުން އަންނަނީ މަސްވެރިންގެ ކަންބޮޑުވުންތައް ހައްލުކުރުމަށް ގިނަ މަސައްކަތްތަކެއް ކުރަމުންނެވެ.
