ރާއްޖޭގެ ކޮމާޝަލް ބަނދަރުގެ ހިދުމަތްތައް އިތުރަށް ހަރުދަނާ ކުރުމަށް، ސަރުކާރުން ކެނޑިނޭޅި ގިނަގުނަ މަސައްކަތްތަކެއް ކުރަމުންދާ ކަމަށް ކޮންސްޓްރަކްޝަން, ހައުސިންގް އެންޑް އިންފްރާސްޓްރަކްޗާ ޑރ. އަބްދުﷲ މުއްތަލިބް ވިދާޅުވެއްޖެއެވެ.
މާލޭ ކޮމާޝަލް ހާބަރަށް ޒިޔާރަތްކުރައްވައި، ބަނދަރުގެ މަސައްކަތްތައް ހިނގަމުންދާ ގޮތް ބައްލަވާލައްވަމުން މިނިސްޓަރު ވިދާޅުވީ އިމްޕޯޓް އެކްސްޕޯޓް ވިޔަފާރިތަކަށް އިތުރު ލުއިފަސޭހަ ގޮތްތަކެއް ތަނަވަސްކޮށްދިނުމަށް ސަރުކާރުން މަސައްކަތްކުރަމުން އަންނަކަމަށެވެ.
މިނިސްޓަރުވަނީ ބަނދަރު ބަދަލުކުރުމުގެ މަޝްރޫއާއި ތިލަފުށީ ބަނދަރު ތަރައްގީކުރުމުގެ މަޝްރޫއުގެ މަސައްކަތް ބައްލަވާފައެވެ. މީގެ އިތުރުން މިނިސްޓަރު ވަނީ ބަނދަރުގެ އެކި ސަރަޙައްދުތަކަށް ޒިޔާރަތްކުރައްވައި، މުވައްޒަފުންނާ ބައްދަލުކުރައްވައި، ބަނދަރުގެ އިތުރު މަސައްކަތްތައް ކުރިއަށްދާ ގޮތާއި ބެހޭގޮތުން މައުލޫމާތު ސާފުކުރައްވާފައެވެ.
މާލޭ ކޮމާޝަލް ހާބަރަށް ދިމާވެފައިވާ ޖާގައިގެ ދަތިކަން ހައްލުކުރުމަށް މި ސަރުކާރުން މާލޭ ޕޯޓު ތިލަފުއްޓަށް ބަދަލުކުރާން ހަމަޖެހިފައިވާކަމަށް މީގެ ކުރިން އެމްޕީއެލްގެ ސީއީއޯ މުހައްމަދު ވަޖީހުވަނީ ވިދާޅުވެފައެވެ. އަދި މާލޭ ހާބަރަށް 38 އަހަރު ވީއިރު، އެ ޕޯޓުގެ ސައިޒަކީ އަދިވެސް 2،000 ކޮންޓެއިނަރުގެ ސައިޒުކަން ފާހަގަކޮށް ވަޖީހުވަނީ މި މައްސަލައަށް ހައްލު ހޯދުމަށް މަސައްކަތްކުރަމުންދާކަން ހާމަކޮށްފައެވެ.
