ގދ. ތިނަދޫ ގައި 10،000 މީހުން ހަމަނުވާތީ އެ ރަށަށް ދިން ސިޓީއެއްގެ ދަރަޖަ އުނިކުރުމަށް އެދި، ހައިކޯޓަށް ހުށަހެޅި ދުސްތޫރީ މައްސަލަ ބަލައިނުގަތުމަށް ނިންމައިފިއެވެ.
މިދިޔަ މަހުގެ 21 ވަނަ ދުވަހު މި މައްސަލަ ހައިކޯޓަށް ހުށަހަޅާފައި ވަނީ، ކުރީގެ އެންވާރަމަންޓް މިނިސްޓްރީގެ ޑެޕިއުޓީ މިނިސްޓަރު އަދި ގާނޫނީ ވަކީލު އަހުމަދު ރަގީބެވެ.
ހައި ކޯޓަށް ދުސްތޫރީ މައްސަލަ ބެލުމަށް ލިބިފައިވާ އިހްތިސާސަކީ ސުޕްރީމް ކޯޓަށް ބަލައިގަންނަ މައްސަަލަތައް ފިޔަވައި، ގާނޫނެއް ނުވަތަ ގާނުނެއްްގެ ބައެއް، ގާނޫނު އަސާސީއާ ތައާރުޒުވާ ކަމަށް ބަޔާންކޮށް ހުށަހަޅާ މައްސަަލަތަކެވެ. ހަމައެއާއެކު ގާނޫނަކުން ބާރު ލިބިގެން ހަދާފައިވާ ގަވައިދެއް ނުވަތަ އެ ގަވައިދެއްގެ ބައެއް، ގާނޫނުއަސާސީއާ ނުވަތަ، ގާނޫނަކާ ތައާރުޒުވާ ނަމަ އެ ފަދަ މައްސަލައެއް ހައިކޯޓާށް ބެލިދާނެ ކަމަށް އެ ކޯޓުން ބުނެއެވެ.
ރާގިބް ހުށަހެޅުއްވި މައްސަލައިގެ ސީޣާ އާއި ދައުވާ ބިނާކުރާ ސަބަބުތަކަށް ބަލާ އިރު، ސިޓީއެއްގެ ދަރަޖަ ދިނުމަށް ކުރީގެ ރައީސް އިބްރާހިމް މުހައްމަދު ސޯލިހު ނެރުއްވި ގަރާރަކީ، ރައްޔިތުންގެ މަޖިލީހުން ފާސްކޮށްފައިވާ މަސްދަރެއް، ނުވަތަ ފާސްކޮށްފައިވާ ގާނޫނަކުން އެކުލަވާލާފައިވާ މަސްދަރެއްކަން ބުނެދީފައި ނުވާ ކަމަށް ހައިކޯޓުން ބުނެއެވެ. އެހެންކަމުން މި މައްސަލައަކީ އެ ކޯޓަށް ބެލުމުގެ އިހުތިސާސް ލިބިފައިވާ މައްސަލައެއް ކަމަށް ނުބެލެވޭތީ މައްސަލަ ބަލައިނުގަންނަން ނިންމީ ކަމަށް ހައިކޯޓުން ވަނީ ބުނެފައެވެ.
މި މައްސަލަ ރާގިބް ހުށަހެޅުއްވި އިރު ހުންނެވީ އެންވާރަމަންޓް މިނިސްޓްރީގެ ޑެޕިއުޓީ މިނިސްޓަރުގެ މަގާުގައެވެ. ނަމަވެސް މި ަމއްސަލަ ހުށަހެޅުމާއެކު އޭނާ ވަނީ މަގާމުން ވަކިކޮށްފައެވެ.
ސަރުކާރުން ބުނި ގޮތުގައި ރަގީބު މަގާމުން ވަކިކުރަން ނިންމީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ. އަދި ރައީސް މި ގޮތަށް ނިންމެވީ ތިނަދޫ އަށް ސިޓީއެއްގެ ދަރަޖަ ދިނުން އުވާލުމަށް ދައުލަތާ ދެކޮޅަށް ކޯޓަށް ދިއުމާ ގުޅިގެންނެވެ.
ރާގިބު، ރައީސް އޮފީހަށް ރައްދުވާ ގޮތަށް ހުށަހެޅި މައްސަލައިގައި ވަނީ، ތިނަދޫގެ އާބާދީގައި 10،000 މީހުން ހަމަވާ ކަމަށް ދައްކާފައި ވަނީ ސައްހަ ނޫން މައުލޫމާތު ތަކެއް ހިމެނޭ އާބާދީގެ ލިސްޓަކުން ކަމަށެވެ. އަދި އެ ރަށުގެ އާބާދީގައި ސިޓީއެއްގެ ދަރަޖަ ދޭ މިންވަރަށް މީހުން ހަމަނުވާ ކަމަށް ބުނެ، ސަބަބުތަކެއް ވަނީ ހިއްސާކޮށްފައެވެ.
އެގޮތުން އެރަށުގެ އާބާދީގައި 10،150 މީހުން އިތުރުކުރުމަށް ޓަކައި މަރުވެފައިވާ 115 މީހެއްގެ ނަން ލިސްޓުގައި ހިމަނާފައިވާ ކަމަށާއި ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރު) އިން ބަލަހައްޓާ އާބާދީގެ ލިސްޓާއި އެރަށު ކައުންސިލްގެ ރަޖިސްޓްރީގައިވާ އާބާދީ ލިސްޓުން ގިނަ ގާނޫނީ މައްސަލަތަކެއް ފާހަގަވާކަމަށް ބުނެފައި ވެއެވެ.
