މިފްކޯއަށް މަސްކިރަމުން އަންނަ ދޯނި ތަކަށް ދޭން ޖެހޭ ފައިސާގެ ތެރެއިން މި މަހުގެ 28 ވަނަ ދުވަހާ ހަމައަށް މަސްވެރިންނަށް ދޭންޖެހޭ 2،337،608 ރުފިޔާ އެ ދޯނިފަހަރުގެ އެކައުންޓްތަކަށް ޖަމާކޮށްފައިވާ ކަމަށް ބުނެފިއެވެ.
މިފްކޯއިން ބުނީ، މި ފައިސާ އިއްޔެގެ ވަގުތެއްގައި އެ އޮޑިދޯނި ފަހަރުގެ އެކައުންތްތަކަށް ޖަމާކުރުމަށް ބީއެމްއެލްއަށް ފޮނުވާފައިވާ ކަމަށާއި މިހާރު އެ ފައިސާ އެ އެކައުންޓްތަކަށް ޖަމާވެފައިވާ ކަމަށެވެ. މި މަހުގެ 28 ވަނަ ދުވާހާ ހަމައަށް 2.34 މިލިއަން ރުފިޔާ ދައްކާފައި ވަީ 203 މެޓްރިކް ޓަނަށް ވާ ފައިސާ ކަމަށް ވެސް މިފްކޯއިން ބުނެއެވެ.
އަދި މިހާރު މަސްވެރިންނަށް ނުދެއްކި ބާކީ ހުރި ފައިސާގެ އަދަދަކީ މި މަހުގެ 29 ވަނަ ދުވަހު ކިރާފައިވާ މަހަށް ވާ 3،711،255 ރުފިޔާ ކަމަށް ވެސް މިފްކޯއިން ބުނެއެވެ.
ކުރީ ސަރުކާރު ނިމުނު އިރު، މަސްވެރިންނަށް ފައިސާ ނުދީ، 250 މިލިއަނެއްހާ ރުފިޔާގެ ބެކްލޮގެއް އޮތް އިރު ރައީސް ޑރ. މުހައްމަދު މުއިއްޒުގެ ސަރުކާރުން ވަނީ އެ ފައިސާއާ އެކުގައި މިހާތަނަށް އައިއިރު، މަސްވެރިންނަށް ވަނީ 983،463،993 ރުފިޔާ ދީފައެވެ. މީގެ ކުރިން މަސްވެރިންނަށް ދޭންޖެހޭ ފައިސާ ނުދިނުމުގެ ސަބަބުން މުޒާހަރާ ކޮށްފައިވާއިރު ސަރުކާރުން އަންނަނީ މަސްވެރިންގެ ކަންބޮޑުވުންތައް ހައްލުކުރުމަށް ގިނަ މަސައްކަތްތަކެއް ކުރަމުންނެވެ.
