ރާއްޖެ ކައިރިއަށް 4.7 މެގްނިޓިއުޑްގެ ބިންހެލުމެއް އަތުވެއްޖެއެވެ.
މޫސުމާ ބެހޭ ގައުމީ އިދާރާ (މެޓް) އޮފީހުން ބުނީ 4.7 މެގްނިޓިއުޑްގެ ބާރުމިނުގައި ބިންހެލުމެއް ކާލްސްބާގް ރިޖް ސަރަހައްދަށް މިއަދު އައިސްފައިވާ ކަމަށާއި މި ސަރަހައްދުން ރާއްޖެއާ ދެމެދުގެ ދުރުމިނަކީ 912 ކިލޯ މީޓަރު ކަމަށެވެ. ކާލްސްބާގް ރިޖް އަކީ އިންޑިއާ ކަނޑުގައި އޮންނަ ސަރަހައްދެކެވެ.
ނަމަވެސް މެޓް އޮފީހުން ބުނީ މި ބިންހެލުމުގެ އަސަރު ރާއްޖެއަށް ނުކުރާނެކަމަށާއި އަދި މި ކަމުގެ ނުރައްކަލެއް ރާއްޖެއަށް ނެތް ކަމަށެވެ.
ފާހަގަކޮށްލެވޭ ގޮތުގައި ކާލްސްބާގް ރިޖް ސަރަހައްދަށް މީގެކުރިންވެސް ވަނީ މިފަދަ ބިންހެލުންތައް އައިސްފައެވެ.
މި އަހަރުގެ މެއި މަހުގެ 27 ވަނަ ދުވަހުވެސް ވަނީ ރާއްޖޭގެ އުތުރަށް ރިކްޓާ މިންގަނޑުން 4.5 ގެ ބާރުމިނުގައި ބިންހެލުމެއް އައިސްފައެވެ. އަދި މި ބިންހެލުމުގެ އަސަރު ހދ. އަތޮޅުގެ ބައެއް ރަށްތަކަށް ވަނީ ކޮށްފައެވެ.
އެފަހަރުވެސް މެޓް އޮފީހުން ބުނީ ހދ. ހަނިމާދޫގައި ގާއިމް ކޮށްފައިވާ ބިންހެލުން މޮނިޓާ ކުރާ މީޓަރަށް އެރޭ ލޮޅުމެއްގެ އަސަރުކޮށްފައި ވާކަން ރެކޯޑް ކުރެވިފައި ވީ ނަމަވެސް މީގެ ސަބަބުން ރާއްޖެއަށް ނުރައްކަލެއް ކުރިމަތި ވާނެ ކަމަށް ލަފާ ނުކުރެވޭ ކަމަށެވެ.