މަސްތުވާތަކެތި ބޭނުންކޮށް، ގެންގުޅެ އެތަކެތީގެ ވިޔަފާރި ކުރާ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ޑްރަގް އެންފޯސްމަންޓުން ހިންގި އޮޕަރޭޝަނެއްގައި ކޯޓު އަމުރެއްގެ ދަށުން ގ.ސްވިންގް ބަލައި ފާސްކޮށް ދެ މީހަކާއި 17 އަހަރުގެ ކުއްޖަކު ހައްޔަރު ކޮށްފިއެވެ.
މި މައްސަލައާ ގުޅިގެން ހައްޔަރުކޮށްފައި ވަނީ 41 އަހަރުގެ، އަހްމަދު ސަފްނީޒް، މާލެ، މއ ކޮޓްންވިލާ، އުމުރުން 23 އަހަރުގެ، މުހައްމަދު އިވާން، ޏ. ފުވައްމުލައް، ދޫޑިގަން، ނިއުވެލީ، އަދި 17 އަހަރުގެ ކުއްޖެކެވެ.
އެ ދެމީހުންގެ ބަންދު ކުރަން ނެރުނު ކޯޓު އަމުރުގައި ބުނެފައިވާ ގޮތުގައި:
- އެ ދެމީހުންގެ ކުޑަކަމުދާތަކެތި ޓީއެޗްސީއަށް ޕޮޒިޓިވް
- އެ ދެމީހުންނަކީ ވެސް މީގެ ކުރިން މި ބާވަތުގެ ރެކޯޑް އޮތް ބައެއް
- ޓްރެފިކިން މިންގަނޑަށް އަރާ ވަރަށް މަސްތުވާތަކެތި ފެނިފައިވޭ
- ޖަމާއަތެއް ގޮތަށް ކުށްކުރުން
އެ މީހުން ހައްޔަރުކޮށްފައި ވަނީ އެ ގެ ބަލައި ފާސްކުރި އިރު ހެރޮއިން ކަމަށް ޝައްކުކުރެވޭ 1 ގްރާމް، މެތަމްފެޓަމިން ކަމަށް ޝައްކުކުރެވޭ 0.75 ގްރާމް އަދި ކެނެބިސް ކަމަށް ޝައްކުކުރެވޭ 43.29 ގްރާމް ފެނުމާ ގުޅިގެންނެވެ. މީގެ އިތުރުން 24,110 ރުފިޔާ ވެސް އެ ގެއިން ފެނިފައިވާ ކަމަށް ފުލުހުން ބުނެއެވެ.
ހައްޔަރުކުރި މީހުންގެ ތެރެއިން އަހްމަދު ސަފްނީޒް 10 ދުވަހަށް އަދި މުހައްމަދު އިވާން 15 ދުވަހަށް ޖަލުގައި ބަންދުކުރުމަށް ކޯޓުން ވަނީ އަމުރުކޮށްފައެވެ. 17 އަހަރުގެ ކުއްޖާ ކޯޓަށް ހާޒިރުނުކޮށް ވަނީ ދޫކޮށްލާފައެވެ.
މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.
