އާޓިފިޝަލް ބީޗު ސަރަހައްދުގެ ސްޓޯމް ވޯޓާ ނެޓްވޯކް އަޕްގްރޭޑްކޮށް ނިމިފައިވާ ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ބުނެފިއެވެ.
މި މަސައްކަތަކީ މާލޭގެ މަގުތަކުގައި ފެންބޮޑުވާ މައްސަލައަށް ވަގުތީ ހައްލެއް ހޯދުމުގެ ގޮތުން ސަރުކާރުން ފަށާފައިވާ މަޝްރޫއުގެ ދަށުން ކުރެވުނު މަސައްކަތެއް ކަމަށް އާރްޑީސީއިން ވަނީ ބުނެފައެވެ.
އާރްޑީސީއިން ބުނީ މަޖީދީމަގާއި ބޮޑުތަކުރުފާނު މަގު އިރުމަތީ ކޮޅު، އާޓިފިޝަލް ބީޗް ސަރަހައްދުގެ ސްޓޯމް ވޯޓާ ނެޓްވޯކް އަޕްގްރޭޑްކޮށް ކަނެކްޝަންތަކުގެ މަސައްކަތް މިހާރު ނިމިފައިވާ ކަމަށެވެ.
މާލެ ސިޓީގެ މަގުތަކުގެ ހާލަތު ދެނެގަނެ މަޖީދީ މަގުގެ އެންމެ ބޮޑަށް ފެންބޮޑުވާ ސަރަހައްދު މަރާމާތު ކުރުމުގެ މަސައްކަތް މާލެ ސިޓީ ކައުންސިލުން ދަނީ ކުރަމުންނެވެ.
އެ ކައުންސިލުން ބުނެފައި ވަނީ މާލެސިޓީގެ މަގުތަކުގެ ހާލަތު ދެނެގަނެ ކުރިމަތިވާ މައްސަލަތައް ހައްލުކުރުމަށް ކުރި ސާވޭގެ ތެރެއިން، މަޖީދީ މަގުގެ އެންމެ ބޮޑަށް ފެންބޮޑުވާ ސަރަހައްދު ގޮތުގައި ފާހަގަވެފައި ވަނީ ޗާންދަނީމަގާއި ރަށްދެބައިމަގާއި ދެމެދު ކަމަށެވެ. އެގޮތުން އެ ސަރަހައްދު މަރާމާތުކުރުމުގެ މަސައްކަތް ކުރަމުންދާ ކަމަށެވެ.
