އިމާރާތްކުރުމުގެ މަސައްކަތަށް ރާއްޖެ ގެނެސްފައިވާ އިންޑިއާގެ މަސައްކަތްތެރިންތަކަކަށް، އެމީހުންނާ ހަވާލުވެފައިވާ ކުންފުނިން އިހުމާލުވެފައިވާ މައްސަލައެއް ބަލަމުން އަންނަކަމަށް ލޭބާ ރިލޭޝަން އެތޮރިޓީން ބުނެފިއެވެ.
ލޭބާ ރިލޭޝަނުން ބުނީ އިމާރާތްކުރުމުގެ މަސައްކަތަށް ރާއްޖެ ގެނެސްފައިވާ އިންޑިއާގެ 40 މީހަކަށް 1 މަހާއި 10 ދުވަހުގެ މުސާރަ ނުދޭކަމަށް ބުނެ އެ އޮތޯރިޓީއަށް މައްސަލައެއް ހުށައަޅާފައިވާކަމަށެވެ. އަދި އެމީހުން އެނބުރި ގައުމަށް ދާން ބޭނުންވާކަމަށް ހުށަހަޅާފައިވާއިރު މި މައްސަލައާ ގުޅިގެން އެ ކުންފުންޏާ މުއާމަލާތްކުރަމުންދާ ކަމަށް އެ އެތޮރިޓީން ވަނީ ބުނެފައެވެ.
މީގެ އިތުރުން އެ އޮތޯރިޓީން ބުނީ މުވައްޒަފުންނަށް ފައިސާ ނުދީ އޮތް މުއްދަތަށްވާ ފައިސާ ދިނުމަށްފަހު، އެނބުރި ގައުމަށް ދާން ބޭނުންވާ މުވައްޒަފުން ފުރުވާލުމުގެ އިންތިޒާމު ހަމަޖައްސަމުން ގެންދާކަމަށް ކުންފުންޏަށް އަންގާފައިވާނެކަމަށެވެ.
ކޮންސްޓްރަކްޝަން މަސައްކަތަކަށް އިންޑިއާއިން ރާއްޖެ ގެނައި 40 މީހަކު ހާލުގައި ޖެހިފައިވާކަމަށް ބުނާ މައްސަލައެއް ފެންމަތިވެފައިވާއިރު، އެމީހުންނާ ހަވާލާދީ ޓައިމްސް އޮފް އިންޑިއާއިން ބުނީ ރާއްޖެ ގެނައިއިރު އެ މީހުންނަށް ރަނގަޅު މުސާރައެއް ދޭނެކަމަށް ބުނިނަމަވެސް އެ މީހުންނަށް މިހާރު މުސާރަ ނުދޭތާ އެތައް މަހެއް ވެފައިވާކަމަށެވެ. އެ ކަމާ ދެކޮޅަށް އަޑުއުފުލުމުން ކުންފުނިން އެ މީހުންނަށް ބިރު ދައްކައި، އެ އެންމެން އެކޮމޮޑޭޝަން ތެރޭގައި ބަންދުކޮށްފައިވާކަމަށް އެ މީހުން ވަނީ ބުނެފައެވެ. އަދި އެ ތަނުން ކަރަންޓު ވެސް ކަނޑައިލައިފައިވާކަމަށް އެމީހުން ވަނި ބުނެފައެވެ.
