ދިވެހިރާއްޖޭގެ ޒަކާތު ހައުސްގެ އެހީ ފަލަސްތީނުގެ ގާޒާއަށް ފޯރުކޮށްދޭން ފަށައިފިއެވެ.
ރާއްޖޭގެ ޒަކާތު ފަންޑުން ގާޒާގެ ރައްޔިތުންނަށް ހަދިޔާކުރަން ނިންމާފައިވާ 100،000 ޑޮލަރު، ގަތަރު ރެޑް ކްރެސެންޓް ސޮސައިޓީއާ ވަނީ ހަވާލުކޮށްފައެވެ.
ގަތަރު ރެޑް ކްރެސެންޓް ސޮސައިޓީއިން އެކްސްގައި ކުރި ޕޯސްޓެއްގައި ބުނީ ރާއްޖޭގެ ޒަކާތު ހައުސްގެ ފަންޑިންއާއެކު ގާޒާގެ ރައްޔިތުންނަށް ސާފު ބޯފެން ފޯރުކޮށްދިނުމުގެ މަސައްކަތް ފަށާފައިވާ ކަމަށެވެ. އެގޮތުން އަލް-ޝިފާ އަދި އަލް-ހަޔާތު ހޮސްޕިޓަލުގައި ޒަހަމްވެފައި ތިބި މީހުންނާއި ބަލިމީހުންނަށް 6،000 ފެން ކޭސް ބަހާފައިވާ ކަމަށާއި އޭގެއިތުރުން 50،000 ފެން ކޭސް ބެހުމަށް ހަމަޖެހިފައިވާ ކަމަށް ވެސް އެ ސޮސައިޓީއިން ވަނީ ބުނެފައެވެ.
ޒަކާތު ހައުސްގެ ފަރާތުން ގާޒާއަށް ދިން 1 ލައްކަ ޑޮލަރު ހަރަދުކުރުމަށް ހަމަޖެހިފައިވަނީ ގާޒާގެ ރައްޔިތުންނަށް ސާފު ބޯފެން ފޯރުކޮށްދިނުމަށް ގަތަރު ރެޑްކްރެސެންޓް ސޮސައިޓީން ކުރިއަށް ގެންދާ މަޝްރޫއުއަށެވެ. މިއީ ޒަކާތު ފަންޑުން ރާއްޖޭން ބޭރުގެ ފަރާތަށް އެހީތެރިކަން ފޯރުކޮށްދޭ ފުރަތަމަ ފަހަރުކަން ފާހަގަކޮށްލެވެއެވެ.
ގާޒާގެ ރައްޔިތުންނަށް އެހީވުމުގެ ގޮތުން ރައީސްގެ އިސްނެންގެވުމުގެ މަތިން މިދިޔަ ޖޫން މަހު ވަނީ "ފަލަސްތީނާއެކު ދިވެހިން" ގެ ނަމުގައި ޓެލެތޯންއެއްވެސް ކުރިއަށް ގެންގޮސްފައެވެ. ޕީއެސްއެމްގައި ކުރިއަށް ގެންދިޔަ މި ޓެލެތޯން ކުރިއަށް ގެންގޮސްފައި ވަނީ ފަންޑު ފޮށީގެ އިތުރުން އޮންލައިން ޓްރާންސްފާވެސް ކުރެވޭ ގޮތަށެވެ.
އެ ޓެލެތޯންގައި ލިބުނު 19 މިލިއަނަށް ވުރެ ގިނަ ރުފިޔާ މިހާރު ފަލަސްތީން ރައްޔިތުންނަށް ހަދިޔާކޮށްފައި ވާއިރު، ފަލަސްތީނަށް އެހީވުމަށް ހާއްސަކޮށްފައިވާ އދ ގެ ރިލީފް ފަންޑަށް ދިވެހި ސަރުކާރުން ކޮންމެ އަހަރަކު ދެމުން އަންނަ ފައިސާގެ އެހީ ދިހަ ގުނަ އިތުރުކޮށް، މިއަހަރުން ފެށިގެން 50 ހާސް ޑޮލަރު ހަދިޔާ ކުރުމަށް އެ ދުވަހު ކުރިއަށް ގެންދިޔަ ޓެލެތޯންގައި ރައީސް ވަނީ ނިންމަވާފައެވެ.
