ހުޅުމާލެ ހިޔާ ފްލެޓުގެ އެޕާޓްމަންޓެއްގައި މީހަކު ރަހީނު ކުރި މައްސަލައިގައި ތުހުމަތު ކުރެވޭ މީހުންގެ މައްޗަށް ދައުވާ ކުރުމަށް ޕްރޮސެކިއުޓާ ޖެނެރަލް އޮފީސް (ޕީޖީ) އަށް މައްސަލަ ފޮނުވާފައިވާ ކަމަށް ފުލުހުން ބުނެފިއެވެ.
މި މައްސަލައިގައި 12 މީހަކު ހައްޔަރުކޮށްފައިވާ އިރު، އޭގެ ތެރޭގައި 18 އަހަރުގެ ދެ މީހުން ހިމެނެއެވެ. މި މައްސަލައިގައި ހައްޔަރުކުރި 12 މީހުންގެ ތެރެއިން 3 މީހަކަށް ފަސް ދުވަހަށް އަދި 9 މީހަކު ހަތް ދުވަހަށް ބަންދު ކުރުމަށް ކޯޓުން ފުރަތަމަ ނިންމިއެވެ.
މިއަދު ފުލުހުން ބުނީ، މި ވަގުތު މި މައްސަލައިގެ ބަންދުގައި ތިބި އެންމެން ވަނީ ކޯޓުން ދޫކޮށްލާފައި ކަމަށާއި އެމީހުންގެ މައްޗަށް ދައުވާ ކޮށްދިނުމަށް އެދި މި މަހުގެ 21 ވަނަ ދުވަހު ޕްރޮސެކިއުޓާ ޖެނެރަލް އޮފީހަށް ހުށަހަޅާފައިވާ ކަމަށެވެ.
މި މައްސަލައިގައި ހައްޔަރުކޮށްފައި ވަނީ، އަލްމާން އަލީ ހާލިދު (22އ)، ގދ. ވާދޫ، މުހައްމަދު އިޒްކާން (18އ)، ކ. މާލެ، އިޒާން އަހުމަދު (18އ)، ކ. ގުރައިދޫ، އެވެ. ހަމައެއާއެކު އަހުމަދު ޒާހިދު (36އ)، ށ. ފޯކައިދޫ، އާދަމް ހުސައިން (48އ)، ލ. މާވަށް، އިބްރާހިމް ނަޝީދު (34އ)، ލ. އިސްދޫ، އަހުމަދު ސަމީހު (22އ)، ބ. ގޮއިދޫ، އިސްމާއިލް ވިޝާމް މުހައްމަދު (29އ)، ކ. މާލެ، ވިޝާމް މުހައްމަދު (23އ)، ގދ. ވާދޫ، ވިޝާން މުހައްމަދު (30އ)، ހުޅުމާލެ ހިމެނެއެވެ. އަދި މުސްތާގު ޝާކިރު (37އ)، ގދ. ވާދޫ، ހައްސަން ގާލިބު (38އ)، ކ. މާލެ ހިމެނެއެވެ.
ގޭންގްއަކުން މީހަކު ރަހީނުކޮށް ހިޔާ ސަރަހައްދުގެ ޓަވަރަކަށް ގެންގޮސްފައިވާ ކަމުގެ މައުލޫމާތު ފުލުހުންނަށް ލިބުނީ މިދިޔަ ނޮވެމްބަރު މަހުގެ 8 ވަނަ ދުވަހުގެ ރޭ 8:00 ހާއިރެވެ. އެއާއެކު އެ މީހާ ހޯދުމުގެ މަސައްކަތް ފަށައި އެ މީހާ ރަހީނުކޮށްފައި ހުރީ H9 ޓަވަރުގެ 20 ވަނަ ފަންގިފިލާގެ 11 ވަނަ އެޕާޓްމެންޓުގައި ކަން ދެނެގަނެވުނީ ސީސީޓީވީ ފުޓޭޖްތައް ބަލައިގެންނެވެ.
އެ އެޕާޓްމެންޓްގެ ދޮރު ވައްޓާލައިގެން ފުލުހުން ވަން އިރު، ރަހީނުކުރި މީހާގެ ބޯ ބާލުވާފައި އޭރު އެމީހާގެ އިނގިލި ބުރިކޮށްލަން ތިބީ ތައްޔާރަށެވެ. އެ އެޕާޓްމެންޓްގައި މަސްތުވާތަކެތި ހުރި އިރު، އެތަނަކީ މަސްތުވާތަކެތީގެ މައްސަލައެއްގައި ފުލުހުން އެކި ފަހަރުމަތިން މީގެ ކުރިން ވެސް ރެއިޑް ކޮށްފައިވާ ތަނެކެވެ. އަދި އެމީހާ އެތަނަށް ގެންގޮސް ފޯނާއި ވޮލެޓް އަތުލާފައިވާ އިރު މިއީ ފައިސާ އާ ގުޅުން ހުރި ކަމަކާ ގުޅިގެން ހިންގާފައިވާ އަމަލެއް ކަމަށް ބެލެވޭ ކަމަށް ފުލުހުން ބުނެފައި ވެއެވެ.
