ފަތުރުވެރިކަމުގެ ސިނާއަތުގައި އިންވެސްޓުކޮށްފައިވާ ފަރާތްތަކުގެ އިންވެސްޓްމަންޓުތައް ރައްކާތެރި ކޮށްދިނުމުގައި ދިވެހި ދައުލަތުން އަދާކުރަންޖެހޭ ޒިންމާ އަދާކުރާނެ ކަމަށް ސަރުކާރު ހިންގާ މައި ޕާޓީ ޕީއެންސީން ބުނެފިއެވެ.
ޕީއެންސީ އިން މިފަދައިން ބުނެފައިވަނީ ޓޫރިޒަމް ބްރޭންޑުތަކުގެ ރިސޯޓުތަކަށް އަމާޒުކޮށް އިދިކޮޅު އެމްޑީޕީން އިސްވެ އޮވެ ޓެރަރިސްޓް ހަމަލާއެއް ދޭން އުޅޭ ކަމަށް ޓޫރިޒަމް މިނިސްޓްރީގެ ސްޓޭޓް މިނިސްޓަރު މުހައްމަދު ނިހާދު ޕީއެންސީގެ ޖަލްސާއެއްގައި ރޭ ދެއްކެވި ވާހަކައާއި ގުޅިގެންނެވެ.
މިކަމާ ގުޅިގެން ނިހާދު ވަނީ މިއަދު އެ މަގާމުން ސަސްޕެންޑުވެސް ކޮށްފައެވެ. މި ތުހުމަތުތަކާއި ގުޅިގެން އެމްޑީޕީން ނެރުނު ބަޔާނެއްގައި ބުނީ ނިހާދު އެ ދެއްވި ވާހަކައަކީ ޓޫރިޒަމް މިނިސްޓްރީގެ ސްޓޭޓު މިނިސްޓަރަކަށް ހުންނަވައިގެން އެއްވެސް ހާލެއްގައި ކޮށްގެންވާނެ ތުހުމަތެއް ނޫން ކަމަށެވެ. ވެރިކަން ކުރާ ޕާޓީން ކުރާ އެފަދަ ތުހުމަތުތަކުގެ ސަބަބުން ފޫނުބެއްދޭ ވަރުގެ ގެއްލުންތަކާ ރާއްޖޭގެ ޓޫރިޒަމަށް އިންޑަސްޓްރީ ކުރިމަތިލާން ޖެހިދާނެ ކަމަށް އެމްޑީޕީން ވަނީ ބުނެފައެވެ.
މިކަމާ ގުޅިގެން ޕީއެންސީން މިއަދު ނެރުނު ބަޔާނެއްގައި ބުނެފައިވަނީ ރާއްޖޭގައި ރަޖިސްޓްރީކޮށްގެން ހިންގާ ސިޔާސީ ޕާޓީއަކުން އަދި މަދަނީ ޖަމިއްޔާއަކުން ވެސް ރާއްޖޭގެ ފަތުރުވެރިކަމަށް އަދި އިގްތިސޯދަށް ފޫނުބެއްދޭ ވަރުގެ ގެއްލުމެއް ލިބިދާނެ ނުރައްކާތެރި އަމަލެއް ނުހިންގާނެ ކަމަށެވެ.
މީގެއިތުރުން ރާއްޖެއަކީ ފަތުރުވެރިންނަށް ރައްކާތެރި މަންޒިލެއްގެ ގޮތުގައި ދެމެހެއްޓުމަށް ސަރުކާރުން އަބަދުވެސް މަސައްކަތް ކުރަމުން ދާކަމަށާއި، އިންވެސްޓްމަންޓުތައް ރައްކާތެރި ކޮށްދިނުމުގައި ދިވެހި ދައުލަތުން އަދާކުރަންޖެހޭ ޒިންމާ އަދާކުރާނެ ކަމަށްވެސް ޕީއެންސީ އިން ވަނީ ބުނެފައެވެ.
އަދި މަދަނީ ޖަމްއިއްޔާތައް ހަރަކާތްތެރިވާނީ ގާނޫނު ހުއްދަ ކުރާ އިމުގެ ތެރޭގައި ކަމަށާއި އެ އިމުން ބޭރުވާ ނަމަ އަޅަން ޖެހޭ ފިޔަވަޅުތައް ދައުލަތުގެ ކަމާ ބެހޭ ފަރާތްތަކުން އަޅާނެ ކަމާ މެދު ޝައްކު ނުކުރާ ކަމަށް ވެސް ޕީއެންސީ އިން ވަނީ ބުނެފައެވެ.
ޕީއެންސީ އިން ބުނީ ފަތުރުވެރިންނާއި އިންވެސްޓަރުންނަށް ވެސް ރައްކާތެރިކަން އޮތް ސުލްހަވެރި އަމާން މަންޒިލަކަށް ރާއްޖެ ހަދަން މުއައްސަސާތައް ގުޅިގެން ކުރާ މަސައްކަތަކަށް ޝުކުރު އަދާކުރާ ކަމަށެވެ.
