މާލެ ސިޓީގެ މަގުތަކުގެ ހާލަތު ދެނެގަނެ މަޖީދީ މަގުގެ އެންމެ ބޮޑަށް ފެންބޮޑުވާ ސަރަހައްދު މަރާމާތު ކުރަން ފަށާފައިވާ ކަމަށް މާލެ ސިޓީ ކައުންސިލުން ބުނެފިއެވެ.
އެ ކައުންސިލުން ބުނީ، މާލެސިޓީގެ މަގުތަކުގެ ހާލަތު ދެނެގަނެ، ކުރިމަތިވާ މައްސަލަތައް ހައްލުކުރުމަށް ކުރި ސާވޭގެ ތެރެއިން، މަޖީދީ މަގުގެ އެންމެ ބޮޑަށް ފެންބޮޑުވާ ސަރަހައްދު ގޮތުގައި ފާހަގަވެފައި ވަނީ ޗާންދަނީމަގާއި ރަށްދެބައިމަގާއި ދެމެދު ކަމަށެވެ. އެގޮތުން އެ ސަރަހައްދު މަރާމާތުކުރުމުގެ މަސައްކަތް ފަށާފައިވާ ކަމަށެވެ.
ރާއްޖެއަށް މިހާރު ކުރަމުން އަންނަ ވިއްސާރައިގައި މާލެއަށް ވެސް ވަނީ ވަރަށް ބޯކޮށް ވާރޭ ވެހިފައެވެ. އެގޮތުން މި ފަހުން މާލެއަށް ކުރި ވިއްސާރައިގައި މާލޭގެ މަގުތައް ވަރަށް ބޮޑަށް ފެންބޮޑުވެ ބައެއް ގެތަކަށް ފެންވަދެ ގެއްލުން ވެފައިވާ ކަމަށް އެންޑީއޭ އިން ބުނެފައި ވެއެވެ.
މަޖީދީ މަގުގެ ޗާންދަނީމަގާއި ރަށްދެބައިމަގާ ދެމެދު ސަރަހައްދަކީ ވާރޭ ވެހުމުން އާންމުކޮށް ފެންބޮޑުވާ ސަރަހައްދެކެވެ. އެންމެ ފަހުން ކުރި ވިއްސާރައިގައި ވެސް އެ ސަރަހައްދުގައި ގިނަ އިރުތަކެއް ވަންދެން ފެންބޮޑުވެ ފެން ނުހިދި ހުރިކަން ފާހަގަވެއެވެ. ދުވާރު މައްޗާއެކު ފެންބޮޑުވެފައިވާ އިރު، ޗާންދަނީ މަގު ވެސް ވަރަށް ބޮޑަށް ވަނީ ފެންބޮޑުވެ، ހިންގާ ބިންގާވެ އުޅެން ދަތިވެފައެވެ.
އެ ސަރަހައްދަކީ މާލޭގެ ސްކޫލްތަކެއް ހިމެނޭ ސަރަހައްދަކަށް ވާއިރު، އެތައް ފިހާރަތަކެއް ވެސް އެ ސަރަަހައްދުގައި ހިމެނެއެވެ. މިއީ މާލޭގެ އެންމެ ކާރޫބާރުބޮޑު ސަރަހައްދު ވެސް މެއެވެ.
