ހުޅުމާލެ ފޭސް 2 ހިޔާ ފްލެޓްތަކުގައި ހިންގަމުންދާ ވިޔަފާރިތަކަށް ހާއްސަކޮށް އިމިގްރޭޝަނުން ކުރިއަށް ގެންދާ އޮޕަރޭޝަނުގައި ރޭ ވެސް 26 ތަނެއް ބަލާ ފާސްކޮށްފިއެވެ.
އިމިގްރޭޝަނުން ބުނީ ރޭ ހިންގި އޮޕަރޭޝަނުގައި 26 ތަނެއް ބަލާ ފާސްކޮށް 04 މީހަކު އިމިގްރޭޝަންގެ ބެލުމުގެ ދަށަށް ގެނެސްފައިވާ ކަމަށެވެ.
ހުޅުމާލެ ފޭސް 2 ހިޔާ ފްލެޓް ސަރަހައްދުގައި އިމިގްރޭޝަނުން ކުރިއަށް ގެންދިޔަ ރެއިޑުގައި އެއްޔެރޭވެސް ވަނީ 8 ފިހާރަ، 4 ކެފޭ/ރެސްޓޯރަންޓު/ބޭކަރީ އަދި 1 ސެލޫން ބަލައި ފާސްކޮށްފައެވެ. އަދި އޭގެތެރެއިން ދެ ތަނެއްގައި ގަވާއިދާ ހިލާފަށް މަސައްކަތް ކުރަމުންދިޔަ 3 މީހަކު އިމިގްރޭޝަންގެ ބެލުމުގެ ދަށަށް ވަނީ ގެންގޮސްފައެވެ.
ގަވާއިދާ ހިލާފަށް އުޅެމުންދާ ބިދޭސީންގެ މައްސަލަ ހައްލު ކުރުމަށް އިމިގްރޭޝަނުން އަންނަނީ ގިނަ އޮޕަރޭޝަންތަކެއް ހިންގަމުންނެވެ. އިމިގްރޭޝަނުން މީގެ ކުރިން ވަނީ، މި އަހަރުގެ އަމާޒަކީ ގަވާއިދާ ހިލާފަށް އުޅޭ 5،000 ބިދޭސީން ފޮނުވައިލުން ކަމަށާއި އެ އަމާޒަށް މިހާރު ވާސިލުވެފައިވާ ކަމަށެވެ.
