ރައީސް ޑރ.މުހައްމަދު މުއިއްޒުއަށް އެނގިވަޑައިގެން ރައްޔިތުންގެ ހައްގަށް އުނިކަން ލިބޭނެ އެއްވެސް ކަމެއް ހިންގިޔަ ނުދެއްވާނެކަމަށް ސިޓީސް، ލޯކަލް ގަވަމެންޓް އެންޑް ޕަބްލިކް ވޯކްސް މިނިސްޓަރު އާދަމް ޝަރީފް އުމަރު ވިދާޅުވެއްޖެއެވެ.

ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް، ވެރިފައި ކުރުމެއް ނެތި ގޯތި ދޫކޮށްފައިވާކަމަށް ތުހުމަތު ކުރެވޭ މައްސަލަ ފެންމަތިވެ ސަރުކާރަށް ބޮޑެތި ފާޑުކިޔުންތަކެއް ވަނީ އަމާޒުވެފައެވެ. މި މައްސަލައިގެ ޖިނާއީ ތަހުގީގެއް ފުލުހުން އިސްނަގައިގެން ފަށާފައިވާއިރު ޕީޖީއިން ވެސް މި މައްސަލަ ވީހާވެސް އަވަހަށް ތަހުގީގުކޮށް ދައުވާކުރުމަށް ފޮނުވުމުގެ އަމުރެއް ނެރެފައެވެ.

މި މައްސަލައިގައި ސަރުކާރަށް ގިނަ ފާޑުކިޔުންތަކެއް އަމާޒުވަމުން އަންނައިރު މިނިސްޓަރު ވިދާޅުވީ ކޮރަޕްޝަންގެ އެއްވެސް ފުރުސަތެއް ރައީސް މުއިއްޒުގެ ސަރުކާރުން ނުދެއްވާނެކަން ރައީސްގެ ނިންމުންތަކުން ސާފުވާނެކަމަށެވެ. ރާއްޖެއިން ކޮރަޕްޝަން މަދުކުރެވޭނީ، ކޮރަޕްޝަނަށް މަގުފަހިވާ ކަންތައްތަކަށް ކޮންމެ ކަމަކަށް ހުރިހާ މުއައްސަސާތަކުންނާއި ރައްޔިތުންވެސް ނޫނެކޭ ބުނެގެން ކަމަށެވެ. އަދި އެ ހިތްވަރު އެންމެންގެ ހުންނަން ވާނެކަމަށް މިނިސްޓަރު ވިދާޅުވިއެވެ.

މި ސަރުކާރުން ކޮރަޕްޝަނާއި ދެކޮޅަށް މަސައްކަތްކުރައްވާނެކަމަށް މީގެ ކުރިންވެސް ރައީސް ވަނީ ވިދާޅުވެފައެވެ. އެގޮތުން ރިޔާސީ އިންތިހާބުގައި ލިބިވަޑައިގަތް ކާމިޔާބީ އާއި ގުޅިގެން ދިވެހި ރައްޔިތުންނަށް ޝުކުރު އަދާކުރެއްވުމުގެ ގޮތުން ބޭއްވެވި އެއްވުމުގައި ރައީސް ވިދާޅުވީ ކޮރަޕްޝަންގެ ޢާމަލުތައް ހިންގާނަމަ، ސަރުކާރުން އިސްވެ އެ ފަރާތްތަކާ ދޭތެރޭގައި އަޅަންޖެހޭ ފިޔަވަޅު އެޅުމަށްޓަކައި ހަވާލުކުރާނެ ކަމަށެވެ. އަދި ސަރުކާރުގެ ނިޒާމުގެ ތެރޭގައި އެފަދަ ކަންކަން ހިނގުން މަދުކޮށް ސާފު ސަރުކާރެއް ގާއުމުކޮށް ދިނުމަކީ އެ މަނިކުފާނުގެ އަމާޒެއްކަމުގައި ރައީސް ވިދާޅުވިއެވެ. "އެއީ އަޅުގަނޑުވީ ވައުދެއް. ސާފު ސަރުކާރެއް ގާއިމްކުރުމުގެ ވާހަކަ. އިރާދަކުރެއްވިއްޔާ އަޅުގަނޑުމެންގެ ތެރޭގައި ސާފު ސަރުކާރެއް ގާއިމްކުރުމުގެ ރޫހު އޮންނާނީ. އެ އަޒުމުގައު މަސައްކަތް ކުރާނީ." ރައީސް ވިދާޅުވިއެވެ.

މީގެ އިތުރުން ރައީސް ވިދާޅުވީ ރައްޔިތުންނަށް ފެންނާނީ ދެފުށް ފެންނަ އެއްވެސް ކަމެއް ނުފޮރުވާ، ޖަވާބުދާރީވުމުގައި ޖެހިލުމެއް ނުވާ ސާފު ސަރުކާރެއްކަމަށެވެ.

ހަބަރު އާދަމް ޝަރީފް އުމަރު ޑރ. މުހައްމަދު މުއިއްޒު