މިދިޔަ ސަރުކާރުން މާލެ މީހުންނަށް ގޯތި ދޭން ހިންގި 'ބިންވެރިޔާ' ސްކީމްގައި ނުހިމެނޭ ފަރާތްތަކަށް ގޯތި ދެވޭނީ ހައުސިން މިނިސްޓްރީ އަށް ވެސް އެނގިގެން ކަމަށާއި، މި މައްސަލައިގައި މިހާރުގެ މިނިސްޓަރު ޑރ. އަލީ ހައިދަރު އަހްމަދު ސަސްޕެންޑްކުރަން ޖެހޭ ކަމަށް، އެ މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެއެވެ.

'ބިންވެރިޔާ'ގެ ލިސްޓުގައި ނެތް ނަމަވެސް، އެޗްޑީސީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދުގެ އެއްބަނޑު އެއްބަފާ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދަށް ހުޅުމާލެއިން ގޯތި ދިން ކަމަށް ބުނާ މައްސަލައެއް ވަނީ ފެންމަތިވެފައެވެ. ފުލުހުންނާއި އޭސީސީން ވެސް އެ މައްސަލަ ތަހްގީގުކުރަން ވަނީ ފަށައިފައެވެ.

މިކަމާ ގުޅިގެން އިދިކޮޅު އެމްޑީޕީގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި އަކްރަމް މިއަދު ވިދާޅުވީ، ޖުލައި މަހު ހައުސިން މިނިސްޓްރީ އަށް މި މައްސަލަ ފެންމަތިވި ހިސާބުން ފެށިގެން ފިޔަވަޅު ނޭޅި ސަބަބާ މެދު ސުވާލު އުފެދޭ ކަމަށެވެ. އޭނާ ވިދާޅުވީ ބިންވެރިޔާ ސްކީމްގެ ތަފްސީލު ހައުސިން މިނިސްޓްރީ އަށް އެނގޭނެ ކަމަށާއި، މިނިސްޓްރީން އެޗްޑީސީ އަށް ނާންގާހާ ހިނދަކު އެ ސްކީމްގެ ދަށުން ދޫކުރި ޕްލޮޓްތަކުގެ ތަފްސީލު އެ ކޯޕަރޭޝަނަށް ނޭނގޭނެ ކަމަށެވެ.

މި މައްސަލައިގައި ހައިދަރުގެ އިސްތިއުފާ އަށް ގޮވާލައި، އޭނާ މަގާމުން ސަސްޕެންޑުކުރަން ޖެހޭނެ ކަމަށް އަކްރަމް ވިދާޅުވިއެވެ.

ކުރީގެ ހައުސިން ކޮމިޓީގެ މެންބަރު މުހައްމަދު އާރިފް ވަނީ، ބިންވެރިޔާ ސްކީމް ހިންގީ ރައްކާތެރި ނިޒާމެއްގެ ދަށުން ކަމަށާއި މި ސްކީމްގެ ހުރިހާ މަރުހަލާއެއްގެ މަސައްކަތްތައް ކުރިއަށް ގެންދިޔައީ އެއްވެސް ކަމެއް ގޯސްކޮށް ނުދާނެ ގޮތަކަށް ކަމަށް ވިދާޅުވެ، ސްކީމް ކުރިއަށް ގެންދިޔަ ގޮތް ތަފްސީލުކޮށްދެއްވައިފައެވެ. އޭނާ ވިދާޅުވި ގޮތުގައި:

  • މިނިސްޓްރީން ގޯތި ލިބޭ ފަރާތްތައް ކަނޑައަޅައި ގޯތީގެ ރަޖިސްޓްރީ އާއި ޕްލޮޓް ހަވާލުކޮށް އެޗްޑީސީ އަށް ފޮނުވާނީ ލިސްޓެއް
  • އެ ލިސްޓު އެޗްޑީސީ އަށް ފޮނުވާނީ އީމެއިލާއި ޖެމްސް މެދުވެރިކޮށް ސިޓީއަކާ އެއްކޮށް

"އެގޮތަށް ފޮނުވީމާ އަޅުގަނޑުމެންނާއި އެޗްޑީސީ އާ އޭރުގަ މި ހިންގާފައި އޮތް ކޮމިއުނިކޭޝަން އަކީ 'އަޅުގަނޑުމެން ގޯތި ހަވާލުކުރާނަމޭ، ހަވާލުކުރީމާ ދެން އެ ހުންނަ ބައި އެޗްޑީސީގެ ނޯމަލް ޕްރޮސީޖާގެ ތެރެއިން، މިސާލަކަށް އިމާރާތްކުރުމާއި އިންފާރު ވަކިކުރުމާ، މި ކަންކަމަށް ދޭން ޖެހޭ ހުއްދަތައް ދެމުން ގެންދާށޭ،' އެހިސާބުން އެޗްޑީސީ އާ ހިސާބުންނޭ ދެން ހުރި މަސައްކަތްތައް ކުރިއަށް ގެންދާނީ،" އާރިފް ވިދާޅުވިއެވެ.

އާރިފް އިތުރަށް ވިދާޅުވީ، މިނިސްޓްރީން އެގޮތަށް ރަޖިސްޓްރީ ދޫކޮށް ބިން ހަވާލުކުރުމުން ބައެއް ފަރާތްތަކުން އިން ވަކިކުރަން ޕޯޓަލް މެދުވެރިކޮށް ހުށަހަޅާ ކަމަށާއި، އެގޮތަށް ހުށަހެޅުމުން ހައުސިން މިނިސްޓްރީން ގޯތި ލިބުނުކަން އެ ފަރާތްތަކަށް އަންގާފައިނުވާ ކަމަށް އެޗްޑީސީން ޖަވާބު ދޭ ކަމަށެވެ. އެޗްޑީސީން ހުއްދަ ނުދެނީ އާރިފް ވިދާޅުވި ގޮތުގައި، މިނިސްޓްރީން އޭރު އެ ކޯޕަރޭޝަނަށް ލިސްޓު ނުފޮނުވައި އޮތުމުންނެވެ.

މީގެ ކުރިން ގޯތި ދޫކުރާއިރު ކުދި މައްސަލަތައް ދިމާވެގެން ބައެއް ގޯތިތައް ދޫނުކޮށް ހިފަހައްޓާފައި ހުންނާނެ ކަމަށާއި، މިހާރު މި ދިމާވެގެން މި އުޅޭ މައްސަލައިގައި ގޯތި ދޫކޮށްފައި ވަނީ އެގޮތަށް ހިފަހައްޓާފައިވާ ދެ ޕްލޮޓަކުން ކަމަށް އޭނާ ވިދާޅުވިއެވެ.

މި މައްސަލައާ ގުޅިގެން:

  • އެޗްޑީސީގެ ޗެއާމަން އަހްމަދު ނާސިފް ފިޔަވައި ފަޒުލް ހިމެނޭހެން ހުރިހާ ބޯޑު މެންބަރުން ވަނީ ސަސްޕެންޑުކޮށްފައި
  • ފަޒުލްގެ ބޭބެ ފަޒީލް ވެސް ވަނީ ސަސްޕެންޑުކޮށްފައި
  • ފުލުހުންނާއި އޭސީސީން ގެންދަނީ ތަހްގީގު ހިންގަމުން
  • ޕްރޮސެކިއުޓާ ޖެނެރަލް ވަނީ މައްސަލައިގެ ޖިނާއީ ތަހްގީގެއް ހިންގަން އަމުރުކުރައްވާފައި
ހަބަރު ހައުސިން މިނިސްޓްރީ ބިންވެރިޔާ ސްކީމް އެމްޑީޕީ ޑރ. އަލީ ހައިދަރު އަހްމަދު