މިދިޔަ ބުރާސްފަތި ދުވަހު ހިނގި އަލިފާނުގެ ހާދިސާގައި ގެއްލުން ލިބުނު ގެތަކުގެ ދިރިއުޅެމުން ދިޔަ 22 މީހުން އަދިވެސް ވަގުތީ ހިޔާތަކުގައި އެބަތިބި ކަމަށް ނޭޝަނަލް ޑިޒާސްޓާ މެނޭޖްމެންޓް (އެންޑީއެމްއޭ) އިން މިއަދު ބުނެފިއެވެ.
އަލިފާނުގެ ހާދިސާ ހިނގި ގްރީން ބިލްޑިންގް ކައިރީ އަމީނީ މަގުގައި ހުރި ގެތަކަށް ދުމުގެ އަސަރުކޮށް ގެއްލުން ލިބިފައިވާއިރު، މ. ލޯކަށިގެ އާއި މ. ކުދިމާވިލާ އަދި މ. ލޫބިޔާ އިން މީހުން ހުސްކޮށް 50 މީހުން އެ ދުވަހު ވަނީ ވަގުތީ ހިޔާތަކަށް ބަދަލުކޮށްފައެވެ. އެންޑީއޭ އިން ބުނީ އެ ދުވަހު ވަގުތީ ހިޔާތަކަށް ބަދަލުކުރި މީހުންގެ ތެރެއިން 22 މީހަކު އަދިވެސް ތިބީ އެ ތަންތަނުގައި ކަމަށެވެ. އިތުރަށް އެންޑީއެމްއޭ އިން ބުނީ ވަގުތީ ހިޔާތަކުގައި މިހާރު ތިބީ މ. ލޯކަށިގޭގެ ފަސް އެޕާޓްމަންޓުގައި ދިރިއުޅޭ މީހުން ކަމަށެވެ.
އެންޑީއެމްއޭ އިން ބުނީ މި ހާދިސާގެ އަސަރު ކުރި ގެތަކުގެ ބައެއް މީހުން ތިބުމަށް ގެސްޓް ހައުސް ހަމަޖައްސައިދީފައި ވާނެ ކަމަށެވެ. އަދި އަނެއްބައި މީހުން ބޭނުން ތަނެއްގައި ތިބުމަށް ފައިސާ ދީފައިވާނެކަމަށް އެންޑީއެމްއޭ އިން ވަނީ ބުނެފައެވެ.
މިދިޔަ ބުރާސްފަތި ދުވަހުގެ ހެނދުނު 6:30 ހާއިރު ހައުސިން މިނިސްޓްރީގައި ރޯވި އަލިފާންގަނޑު ކޮންޓްރޯލު ނުކުރެވި، އެ އިމާރާތުގައި ހިންގާ ކޮންސްޓްރަކްޝަން މިނިސްޓްރީ އަދި އެ ތަނާ ޖެހިގެން ހުންނަ އެންވަޔަރަންމެންޓް މިނިސްޓްރީގައިވެސް ވަނީ ބޭނުން ނުކުރެވޭ ވަރަށް އަނދާފައެވެ. މީގެ އިތުރުން މާލެ ސިޓީ ކައުންސިލްގެ ހިދުމަތް ދެމުން ދިޔަ އިމާރާތް ވަނީ ބޭނުން ނުކުރެވޭ ވަރަށް އަނދާފައެވެ.
