މީގެ 5 އަހަރު ކުރިން ކ. ކާށިދޫގައި ބަންގްލަދޭޝް ރައްޔިތަކު ދަތްމަރުތޭލަކުން މީހަކަށް ހަމަލާދިން މައްސަލައިގައި 5 އަހަރަށް ޖަލަށް ލާން ހުކުމް ކޮށްފިއެވެ.
ނޮވެމްބަރު 13، 2020 ވަނަ ދުވަހުގެ ހަވީރު 5:50 ހާއިރު، ކ. ކާށިދޫ، ޗަމަންގޭގައި ހުރި ބަންގްލަދޭޝް މީހެއް ކަމަށްވާ އެމްޑީ އަލް އަމީންގެ ބޮލުގައި އާއި އަތުގައި ޖަމަލް ހޮސަން ދަތްމަރުތޭލަކުން ވަނީ ޖަހާފައެވެ. އަމީންއަށް މި ހާދިސާގައި ލިބިފައިވާ އަނިޔާތައް މެޑީކޯ ރިޕޯޓުން ދައްކައެވެ.
މި މައްސަލައިގައި ޖަމަލް ހޮސަންގެ މައްޗަށް ދައުލަތުން ދައުވާ ކޮށްފައި ވަނީ ޖޫން 13، 2021 ވަނަ ދުވހުއެވެ. މި މައްސަލައިގައި ކާށިދޫ ކޯޓުގައި ބޭއްވި އިބްރިދާއީ އަޑުއެހުމުގައި ޖަމަލް ވަނީ ދައުވާއަށް އިއުތިރާފް ވެފައެވެ. ނަމަވެސް ކްރިމިނަލް ކޯޓަށް ދައުލަތުން މި މައްސަލަ ހުށަހެޅި އިރު ޖަމަލްގެ މައްޗަށް ކޮށްފައިވާ ދައުވާތަކަށް އިއުތިރާފް ވެފައިވާ ކަން އެނގޭ ބަޔާންތައް ހުށަހަޅާފައި ނުވާ ކަމަށް ކްރިމިނަލް ކޯޓުން ބުނެއެވެ. ނޮވެމްބަރު 23، 2021 އާ ހަމައަށް ވެސް އޭނާ އިއުތިރާފްވި ބަޔާން ކޯޓަށް ހުށަހަޅާފައި ނުވުމުން މި މައްސަލަ ވަނީ އަލުން ފަށައިގެން ކުރިއަށް ގެންދިއުމަށް ނިންމާފައެވެ.
ނަމަވެސް ކްރިމިނަލް ކޯޓުގައި ފެބްރުއަރީ 19، 2023 ގައި ބޭއްވި އިބްތިދާއީ އަޑުއެހުމުގައި ޖަމަލް ވަނީ އޭނާގެ މައްޗަށް ކޮށްފައިވާ ދައުވާ އަށް އިންކާރުކޮށްފައެވެ. މި މައްސަލައިގައި ދައުލަތުން ހެކިތައް ހުށަހެޅި އިރު، ކ. ކާށިދޫ ކޯޓުގައި ޖަަމްލަ ދައުވާ އަށް އިއުތިރާފްވި ކަމުގެ ބަޔާނާއި، ޖަމަލް ފުލުހުންނަށް ދީފައިވާ ބަޔާނާއި، އަމީންގެ މެޑީކޯ ރިޕޯޓާއި އިތުރު ހެކިތައް ވެސް ހުށަހަލާފައިވެއެވ. ނަމަވެސް ޖަމަލްގެ ފަރާތުން ދިފާއީ ހެއްކެއް ހުށަހަޅާފައެއް ނުވެއެވެ.
މި މައްސަލަ ބަލައި ނިންމައި މިއަދު ކްރިމިނަލް ކޯޓުން ހުކުމް ކޮށްފައިވާ އިރު، އެ ކޯޓުން ބުނީ، ޖަމަލްގެ މައްޗަށް ކޮށްފައިވާ ދައުވާއަށް ހުށަހެޅި ހެކި ގަރީނާއިން ޝައްކެއް ނެތް މިންވަރަށް އޭނާ އެ ކުށްކުރި ކަމަށް ސާބިތުވާ ކަމަށެވެ. މީހަކަށް ނުރައްކާތެރި ހާނިކައެއްވާ ގޮތަށް ތޫނު އެއްޗަކުން ނުވަތަ ހަތިޔާރަކުން ޖަމަލް ހަމަލާ ދީފައިވާ ކަމަށާއި އެކަމުގެ އަދަބެއްގެ ގޮތުގައި 10 އަހަރު ދުވަހުގެ މުއްދަތަށް ޖަލަށް ލުމަށް ކްރިމިނަލް ކޯޓުން ކުރި ހުކުމުގައި ބުނެފައި ވެއެވެ.
މި މައްސަލައިގައި ޖަމަލްގެ ބަންދުގެ ދުވަސްތައް އުނި ކުރުމަށް ފަހު އޭނާ މިހާރު ޖަލުގައި ހޭދަ ކުރަން ޖެހޭނީ 5 އަހަރާއި 19 މަހާއި 25 ދުވަހެވެ.
