ދިވެހިންނަކީ އެންމެ ކުރީއްސުރެން ކަނޑުގެ ވަސީލަތްތަކުން ނަފާ ހޯދަމުންއައި ބައެއްކަމަށާއި މޫސުމަށް އަންނަ ކޮންމެ ބަދަލަކާއެކު ލިބޭ ގެއްލުމުގެ އަސަރު ފުރަތަމަ ކުރާނީ ދިވެހިންނަށްކަމަށް ފިޝަރީސް މިނިސްޓަރު އަހުމަދު ޝީޔާމް ވިދާޅުވެއްޖެއެވެ.
ޗައިނާ އިންޑިއަން އޯޝަން ރީޖަން ފޯރަމުގެ ހަވާސާގެ ތެރެއިން ކުރިއަށްދިޔަ ތީމެޓިކް ޑިސްކަޝަން އޮން ދަ އޯޝަން ޑިކޭޑު އޮފް ޔުނައިޓެޑް ނޭޝަންސް އިން ދަ ކޮންޓެކްސް އޮޮފް ގްލޯބަލް ޑިވެލޮޕްމަންޓު އިނިޝިއޭޓިވްގައި މިނިސްޓަރު ވިދާޅުވީ ކަނޑުތައް ހިމާޔަތް ކުރުމުގެ ކަންކަން ނިންމަން ޖެހޭނީ ސައިންސްގެ އަލީގައި ކަމަށެވެ.
އޯޝަން ޑިކޭޑްގެ މިއަހަރު ޝިއާރުކަމުގައި "ދުނިޔޭގެ ކަނޑުތައް ހިމާޔަތްކުރުމަށް ބޭނުންވާ ސައިންސްގެ ކުރިއެރުންތައް" ދިވެހިންނާއި ވަރަށް ބޮޑަށް ގުޅިފައިވާކަމަށް މިނިސްޓަރު ވިދާޅުވިއެވެ. "އޯޝަން ޑިކޭޑަކީ އަޅުގަނޑުމެންގެ ކަނޑުތަކަށް ކުރިމަތިވެފައިވާ ގޮންޖެހުންތަކާއި ކުރިމަތިލުމަށް، ސައިންސްގެ އަލީގައި ކަންކަން ނިންމުމަށް ލިބޭ ފުރުސަަތެއް" ޝިޔާމް ވިދާޅުވިއެވެ.
ކަނޑުތައް ހިމާޔަތްކޮށް ކުރިއަށް އޮތް ޖީލުތަކަށް ފޯރުކޮށްދިނުމަށް މަސައްކަތް ކުރަން ޖެހޭކަން ފާހަގަކޮށް މިނިސްޓަރު ވިދާޅުވީ ދުނިޔެއަށްް ކުރިމަތިވާ ގޮންޖެހުންތަކަށް ހައްލު ހޯދުމަށް ގައުމުތައް ގުޅިގެން މަސައްކަތްކުރަން ޖެހޭ ކަމަށެވެ. އަދި މިކަންކަމުގައި ގައުމުތަކުގެ ވަސީލަތްތަކާއި، ތަޖުރިބާއާއި، ހިޔާލު ހިއްސާކުރުން މުހިއްމުކަމަށް މިނިސްޓަރު ވިދާޅުވިއެވެ. އިތުރަށް މިނިސްޓަރު ވިދާޅުވީ ގައުމުތައް އެކުގައި ކުރެވޭ މަސައްކަތުން، ކުރިއަށް އޮތް ޖީލުތަކަށް ދެމެހެއްޓެނިވި މުސްތަގުބަލެއް ކަށަވަރުކޮށްދެވޭނެ ކަމަށެވެ.
