އެމެރިކާގެ ރައީސް ކަމަށް ހޮވިވަޑައިގެންފައި ވާ ކުރީގެ ރައީސް ޑޮނާންޑް ޓްރަމްޕާ ދެކޮޅަށް ކޯޓުގައި ޝަރީއަތް ހިނގަމުން ދިޔަ އިރު، ރޭޕްގެ ކުށް ސާބިތުވި ކަމަށް އޭބީސީ ނިއުސް އިން ރިޕޯޓު ކުރި މައްސަލައިގައި ޓްރަމްޕްގެ ފަރާތުން އަބުރުގެ ދައުވާ ކުރުމުން ބަދަލުގެ ގޮތުގައި 15 މިލިއަން ޑޮލަރު ދޭން ޖެހިއްޖެއެވެ.
ކަސްބީ އަންހެނަކާއެކު ނާޖާއިޒު ގުޅުމެއް ބާއްވަވައި، އެ ގުޅުން ސިއްރު ކުރުމަށް އެ އަންހެން މީހާއަށް ޓްރަމްޕް ފައިސާ ދެއްވި މައްސަލައެއްގައި ޖިންސީ ގޯނާ ކުރި ކަމުގެ ކުށުގެ ދައުވާ ކޯޓުގައި ހިނގަމުން ދިޔަ އިރު އެހެން ބައެއް މީޑިއާތައް ފަދައިން އޭބީސީންވެސް ގެންދިޔައީ އެ ހަބަރުތައް ގެނެސް ދެމުންނެވެ.
އެގޮތުން އޭބީސީގެ ރިޕޯޓަރު ޖޯޖް ސްޓެފަނޯޕޯލަސް ހުށަހަޅައިދިން ޕްރޮގްރާމެއްގައި ގާނޫނުހަދާ މަޖިލީހުގެ މެންބަރަކާ އިންޓަވިއު ކުރަމުން، ރޭޕްގެ ކުށް ޓްރަމްޕްގެ މައްޗަށް ސާބިތުވެއްޖެ ކަމަށް ތަކުރާރު ކޮށް ބުނެފައި ވެއެވެ. ރޭޕް ކުރުމާއި ޖިންސީ ގޯނާ އަކީ އެމެރިކާގެ ގާނޫނުތަކުގައި ވަކި ސިފަތަކެއް ދީފައިވާ 2 ކުށެކެވެ.
މި މައްސަލަ ކޯޓުން ބޭރުން ހައްލު ކުރުމަށް އޭބީސީން 15 މިލިއަން ޑޮލަރު ދޭން އެއްބަސްވެ އެކަން ވަނީ މިހާރު އިއުލާން ކޮށްފައެވެ. މި ފައިސާ އެ މީޑިއާއިން ދޭނީ، ޓްރަމްޕްގެ ކުރީ ސަރުކާރުގައި އުފައްދާފައިވާ މިއުޒިއަމް ފަންޑަށެވެ.
މި ފައިސާގެ އިތުރުން ޓްރަމްޕްގެ ފަރާތުން ގާނޫނީ ކަންކަމަށް ކުރި ހަރަދުގެ ގޮތުގައި 1 މިލިއަން ޑޮލަރު ދޭންވެސް އޭބީސީން ވަނީ އެއްބަސްވެފައެވެ.
