ބުރާސްފަތި ދުވަހު ހިނގި އަލިފާނުގެ ބޮޑު ހާދިސާ ހިނގި ގޮތުގެ ތަހުގީގަށް ރާއްޖެއިން ބޭރުގެ އެހީ ހޯދަން ނިންމާފައިވާ ކަމަށް ކޮމިޝަނާ އޮފް ޕޮލިސް (ސީޕީ) އަލީ ޝުޖާއު ވިދާޅުވެއްޖެއެވެ،
ތިން މިނިސްޓްރީ އެއްގެ އިތުރުން މާލެ ސިޓީ ކައުންސިލްގެ އިދާރާގެ ބައެއްގައި ރޯވި ހާދިސާ އާއި ގުޅޭ މައުލޫމާތު ދިނުމަށް މިއަދު ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ސީޕީ ވިދާޅުވީ އަލިފާން ނިއްވުމުގައި ސިފައިންނަށް އެހީތެރިކަން ފޯރުކޮށްދިނުމަށް ފުލުހުންގެ ހުރިހާ ވަސީލަތެއް ބޭނުން ކުރި ކަމަށެވެ.
ފުލުހުން މިފަދަ ބޮޑު ހާދިސާއެއްގެ ތަހުގީގު ކުރިއަށް ގެންދާނެކަމުގެ ޔަގީންކަން ދެއްވަމުން ސީޕީ ވިދާޅުވީ އެ ތަހުގީގުގައި ރާއްޖެއިން ބޭރުގެ ޓީމެއްގެ އެހީތެރިކަންވެސް ހޯއްދަވާނެ ކަމަށެވެ. އެގޮތުން ކުރިއަށް އޮތް ދެތިން ދުވަހުގެ ތެރޭގައި އެ ޓީމު ފުލުހުންގެ އިންވެސްޓިގޭޝަން ޓީމާއެއްކޮށް މަސައްކަތް ކުރެވޭނެ އިންތިޒާމުތައް ކުރިއަށް ގެންދިއުމަށްޓަކައި ސަރުކާރުގެ ކަމާ ގުޅުންހުރި ފަރާތްތަކާއެކު މަސައްކަތް ކުރާނެކަމަށް ސީޕީ ވިދާޅުވިއެވެ.
މީގެ އިތުރުން އޭނާ ވިދާޅުވީ އަލިފާނުގެ ހާދިސާ ހިނގި ސަރަހައްދު މިހާރު ފުލުހުންނަށް ހަވާލު ކޮށްފައިވާ ކަމަށެވެ. ފުލުހުންގެ ފޮރެންސިކް ޓީމުތަކުން އެ ސަރަހައްދުގައި މަސައްކަތް ކުރަމުން އަންނައިރު ސީސީޓީވީ ފުޓޭޖްތައް ހޯދައި އެނަލައިޒް ކުރުމުގެ މަސައްކަތްތައްވެސް ކުރިއަށްދާކަމަށް ސީޕީ ވިދާޅުވިއެވެ. އަދި އަލިފާނުގެ ހާދިސާގެ މަންޒަރު އެންމެ ފުރަތަމަ ފެނުނު މީހުންގެ ބަޔާން ނެގުމުގެ މަސައްކަތާއި އެވަގުތު އެތަނުގައި ތިބި މީހުންގެ އިތުރުން، އިތުރު މީހުންގެ ފަރާތުންވެސް މައުލޫމާތު ހޯދުމަށް މަސައްކަތް ކުރަމުންދާކަމަށް އޭނާ ވިދާޅުވިއެވެ.
މީގެ އިތުރުން ސީޕީ ވަނީ މިކަމާއި ގުޅޭ އެންމެ ފުރިހަމަ މައުލޫމާތު ރައްޔިތުންނާއި ހިއްސާ ކުރާނެކަމުގެ ޔަގީންކަން ދެއްވާފައެވެ.
