ޓެކްސީ ޑްރައިވަރުން ހުޅުމާލޭގައި ރޭ ބޭއްވި އިހުތިޖާޖުން ތިން މީހަކު ހައްޔަރުކުރި ކަމަށް ފުލުހުން ބުނެފިއެވެ.
މާލެ އާއި ހުޅުމާލެއާ ދެމެދު މިހާރަށް ވުރެ ރަނގަޅަށް ޓެކްސީގެ ހިދުމަތް ދިނުމުގެ ބޭނުމުގައި ސަރުކާރުން ޓެކްސީ ފްލީޓެއް ފެށުމަށް ނިންމި ނިންމުމާ ދެކޮޅާށް ޓެކްސީ ޑްރައިވަރުން ވަނީ ރޭ އިހުތިޖާޖު ކޮށްފައެވެ. އަދި ހުޅުމާލެއިން ހައިވޭއަށް އަރާ މަގު ބަންދުވާ ގޮތަށް ކާރުތައް ބާއްވާ އިހުތިޖާޖުގެ ބައިވެރިން އަޑު އުފުލާފައި ވެއެވެ.
ފުލުހުން ބުނީ އެ މައްސަލައާއި ގުޅިގެން ތިން މީހަކު ހައްޔަރު ކުރި ނަމަވެސް އެކަކު ޝަރުތުތަކަކާއެކު ދޫކޮށްލާފައިވާއިރު އަނެއް ދެ މީހުން 5 ދުވަހަށް ބަންދުކޮށްފައިވާ ކަމަށެވެ. އަދި ހުޅުމާލެއިން ހައިވޭއަށް އަރާ މަގު ބަންދުވާ ގޮތަށް ބޭއްވި ޖުމްލަ 22 ޓެކްސީ ޓޯ ކޮށްފައިވާ ކަމަށް ފުލުހުން ވަނީ ބުނެފައެވެ.
ޓެކްސީ ހިދުމަތުގެ ތެރެއަށް ސަރުކާރުން ވަންނަނީ ކަމަށް ބުނެ އިއްޔެ ހަވީރު ވެސް އިހުތިޖާޖު ކޮށްފައި ވެއެވެ. އާންމުންނަށް އުނދަގޫ ނުވާ ގޮތަށް ކުރިއަށް ގެންދިޔަ އިހުތިޖާޖަށް ފުލުހުން ފުރުސަތު ދިން ނަމަވެސް ރޭގެ އިހުތިޖާޖު ފުލުހުން ވަނީ ރޫޅާ ލާފައެވެ. އަދި އެ ވަގުތު ޓެކްސީ ޑްރައިވަރުންނާއި ފުލުހުންނާ ދެމެދު ކޮންމެވެސް ވަރެއްގެ ހަމަނުޖެހުންތަކެއް ހިނގި ނަމަވެސް ފުލުހުން ވަނީ ޓެކްސީތައް ހައިވޭއަށް އެެރިޔަ ނުދީ ހިފަހައްޓާފައެވެ.
ޓެކްސީ ހިދުމަތް ދޭން ފަަށަން ނިންމާފައިވާކަން އެންމެ ފުރަތަމަ ސަރުކާރުން އިއުލާނު ކުރީ ޖުލައި 25 ގައި ނަމަވެސް ޓެކްސީ ޑްރައިވަރުންގެ ކަންބޮޑުވުންތަކާއެކު އެ ނިންމުން ވަނީ ބަދަލުކޮށްފައެވެ.
ނަމަވެސް އޭގެފަހުން މިދިޔަ އޮކްޓޯބަރު މަހު ރައްޔިތުންގެ މަޖިލީހުގެ އިގުތިސާދީ ކޮމިޓީގައި ޓްރާންސްޕޯޓް މިނިސްޓަރު މުހައްމަދު އަމީން ވަނީ ޓެކްސީ ހިދުމަތުގެ ތެރެއަށް ސަރުކާރުން ވަދެ އުސޫލުތަކާއި ގާނޫނުތަކެއް ހަދައިގެން ކޮންޓްރޯލް ނަގަން ޖެހޭ ކަމަށް ވިދާޅުވެފައެވެ. އަދި އެކަން ނުކޮށްފި ނަމަ ވެހިކަލްތަކުން މާލެ ތޮއްޖެހުން އިތުރުވާނެ ކަމަށް ވަނީ ވިދާޅުވެފައެވެ.
