ހައުސިން މިނިސްޓްރީގައި ހިނގި އަލިފާނުގެ ހާދިސާ އާ ގުޅިގެން މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާ ހިންގަމުން އަންނަ "ގްރީން ބިލްޑިން" އަށް އަސަރު ކޮށްފައި ވާތީ ކޮންސްޓްރަކްޝަން މިނިސްޓްރީން ދެމުން ގެންދިޔަ ހިދުމަތްތައް މެދުކަނޑާލައިފިއެވެ.
މިއަދު ހެނދުނު ހައުސިން މިނިސްޓްރީގައި ރޯވި އަލިފާންގަނޑު ކޮންޓްރޯލްކުރުމުގެ މަސައްކަތް ކުރަމުން އަންނައިރު ކޮންސްޓްރަކްޝަން މިނިސްޓްރީން ބުނީ މިއަދު ހެނދުނު ހިނގި އަލިފާނުގެ ހާދިސާ އާއި ގުޅިގެން އެއްވެސް މުވައްޒަފަކަށް އަނިޔާވެފައި ނުވާކަމަށެވެ. ނަމަވެސް މި ހާދިސާގެ ސަބަބުން އިމާރާތަށް ބޮޑެތި ގެއްލުންތަކެއް ލިބިފައިވާ ކަމަށް ކޮންސްޓްރަކްޝަން މިނިސްޓްރީން ވަނީ ބުނެފައެވެ.. އެހެންކަމުން މި ވަގުތު މިނިސްޓްރީން ދެމުން ގެންދާ އާންމު ހިދުމަތްތައް މެދުކަނޑާލާފައިވާކަމަށް އެ މިނިސްޓްރީން ވަނީ ބުނެފައެވެ.
މީގެ އިތުރުން އެ މިނިސްޓްރީން ބުނީ މި ހިދުމަތްތައް އަލުން ފެށޭނެ ތާރީހެއް ކަނޑައެޅުމަށްފަހު އެކަން މިނިސްޓްރީން ވަގުތުން އިއުލާންކުރާނެކަމަށެވެ. އަދި މިހާދިސާއާއި ގުޅިގެން ކަމާއި ގުޅުން ހުރި އިދާރާތަކުން ދެމުން އަންނަ އެއްބާރުލުމަށް މިނިސްޓްރީންވަނީ ޝުކުރު އަދާކޮށްފައެވެ.
އިތުރަށް ކޮންސްޓްރަކްޝަން މިނިސްޓްރީން ބުނީ އެ މިނިސްޓްރީން ދެމުން އަންނަ ހިދުމަތްތައް ވީހާވެސް އަވަހަށް، އަލުން ފެށުމަށް މަސައްކަތްކުރަމުން އަންކަމަށެވެ.
