ގެދޮރުވެރިޔާ ސްކީމާއި ގުޅޭ ހުރިހާ މައުލޫމާތާއި ލިޔެކިޔުންތަކަކީ ހައުސިން މިނިސްޓްރީގެ ކްލައުޑް ހޯސްޓިންގައި ޑިޖިޓަލްކޮށް ބަލަހައްޓާ މައުލޫމާތުތަކެއް ކަމަށާއި އަލިފާނުގެ ހާދިސާއާއި ގުޅިގެން އެ މައުލޫމާތަށް އެއްވެސް އަސަރެއް ނުކުރާނެކަމަށް އެ މިނިސްޓްރީން ބުނެފިއެވެ.
މިއަދު ހެނދުނު ހައުސިން މިނިސްޓްރީގައި ރޯވި އަލިފާންގަނޑު އެންވަޔަރަމެންޓް މިނިސްޓްރީ ހިންގަމުން އަންނަ "ގްރީން ބިލްޑިން" އާ ހަމައަށް ވަނީ އަލިފާނުގެ އަސަރުކޮށްފައެވެ.
މި ހާދިސާއާއި ގުޅިގެން ނެރުނު ބަޔާނެއްގައި ހައުސިން މިނިސްޓްރީން ބުނީ އެ މިނިސްޓްރީއާއި އެންވަޔަރަމެންޓް މިނިސްޓްރީ ހިންގަމުން އަންނަ އިމާރާތުގައި މިއަދު ހެނދުނު އަލިފާން ރޯވެފައިވާއިރު އެމްއެންޑީއެފް ފަޔާ އެންޑް ރެސްކިއު ޓީމުން އަލިފާން ނިއްވުމުގެ މަސައްކަތް ކުރަމުން އަންނަކަމަށެވެ. އަދި މި ހާދިސާގައި މިނިސްޓްރީގެ އެއްވެސް މުވައްޒަފަކަށް އަނިޔާވެފައިނުވާކަމަށް ވަނީ ބުނެފައެވެ.
މީގެ އިތުރުން ހައުސިން މިނިސްޓްރީން ވަނީ މި ހާދިސާއާއި ގުޅިގެން ސަލާމަތާއި ރައްކާތެރިކަަމަށްޓަކައި ކުރެވެން ހުރި ކަންކަމާއި ގުޅޭ ގޮތުން ކަމާއި ގުޅުން ހުރި ފަރާތްތަކާއެކު މަޝްވަރާކުރަމުން އަންކަމަށް ބުނެފައެވެ. އަދި މިކަމާއި ގުޅޭ އިތުރު ތަފްސީލުތައް ހިއްސާކުރާނެ ވާހަކަވެސް އެ މިނިސްޓްރީން ވަނީ ބުނެފައެވެ.
