މީގެ 18 އަހަރު ކުރިން ގއ. މާމެންދޫގައި މަރާލި، ގއ. ވިލިނގިލީ، ކަނޑުއޮޅި، މުހައްމަދު ޝިހާބްގެ މަރުގެ މައްސަލާގައި ދައުވާކޮށްފައިވާ ދެ މީހެއްގެ ޝަރީއަތް އަލުން ކްރިމިނަލް ކޯޓުގައި މިއަދު ފަށައިފިއެވެ.
2006 ވަނަ އަހަރު ގުރޫޕަކުން ލަކުޑި ބުރިތަކަކުން ހަމަލާ ދިނުމުގެ ސަބަބުން ބޮލަށާއި ސިކުނޑިއަށް ލިބުނު ޒަހަމްތަކުގެ ސަބަބުން ޝިހާބް މަރުވީ ތިން ދުވަހު ކޯމާއެއްގައި އޮތުމަށް ފަހުއެވެ. މި މައްސަލާގައި ހަތަރު މީހެއްގެ މައްޗަށް ދައުވާކޮށް ވަނީ އެމީހުން މަރުމަށް ހުކުމް ކޮށްފައެވެ. އޭގެތެރެއިން ދެމީހެއްގެ މައްސަލަ ހައިކޯޓުގައި އިސްތިއުނާފް ކުރުމުން ވަނީ އަލުން އެ މައްސަލަ ބެލުމަށް ކްރިމިނަލް ކޯޓަށް ފޮނުވާލާފައެވެ.
އެގޮތުން އަލުން މައްސަލަ ބެލުމަށް ނިންމާފައި ވަނީ ގއ. މާމެންދޫ، ޕިންކްލައިޓް، މުހައްމަދު ޝާފްރާޒް އާއި ގއ. މާމެންދޫ، މާސް، އަލީ މަސްއޫދު ސައީދެވެ. މި ދެމީހުންގެ މައްސަލަ ބެލުމަށް އެންމެ ފުރަތަމަ ކްރިމިނަލް ކޯޓަށް ފޮނުވީ 2013 ވަނަ އަހަރުގައެވެ. އަދި 2019 ގައި ކްރިމިނަލް ކޯޓުން ވަނީ މަދަނީ މިންގަނޑަށް މައްސަލަ ނުފެތޭ ކަމަށް ކަނޑައަޅައި އެ މައްސަލަ ބޭރުކޮށްލާފައެވެ.
އަނެއްކާ ވެސް ހައި ކޯޓަށް މައްސަލަ ދިއުމުން، ދެވަނަ ފަހަރަށް ކްރިމިނަލް ކޯޓުން މައްސަލަ އަލުން ބެލުމަށް ހުކުމްކުރީ ނޮވެމްބަރު 2، 2022ގައެވެ. އެގޮތުން މި މައްސަލައިގެ ފުރަތަމަ އަޑުއެހުން ވަނީ މިއަދު ބާއްވާފައެވެ.
މިއަދު ތާވަލް ކުރި އަޑުއެހުމަށް މަސްއޫދު ހާޒިރުވެފައި ނުވާ އިރު، މި މައްސަލަ ބައްލަވާ ގާޒީ އިބްރާހީމް ޒިހުނީ ވިދާޅުވީ މަސްއޫދު ހާޒިރު ނުކުރެވުނީ ޗިޓު ރައްދު ނުކުރެވިގެން ކަމަށާއި، ކުރިއަށް އޮތް އަޑުއެހުންތަކަށް މަސްއޫދު ހާޒިރުކުރުމަށް މަސައްކަތް ކުރާނެ ކަމަށެވެ. އޭނާ ދިރިއުޅޭނީ މާލޭގައި ކަން މިހާރު ޔަގީންކުރެވިފައިވާ ކަމަށް ގާޒީ ވިދާޅުވިއެވެ.
ހަމައެއާއެކު މި މައްސަލައިގައި ހިމެނޭ ދެވަނަ ފަރާތް ޝިފްރާޒަށް ވަކީލަކު ހަމަޖައްސަން 10 ދުވަހުގެ ފުރުސަތެއް ވަނީ ދީފައެވެ.
