އެއް ދުވަހުން ބޭރު ފައިސާ އާ ބެހޭ ބިލު ދިރާސާކޮށް ނިންމައި، ކަމާ ގުޅުން އޮތް ބައްދަލުވުން ސިއްރުކުރަން ރައްޔިތުންގެ މަޖިލީހުގެ މާލިއްޔަތު ކޮމިޓީން ނިންމައިފިއެވެ.
މިއަދުގެ ކޮމިޓީ ބައްދަލުވުމުގައި ބިލުގެ މަސައްކަތް މިއަދު ކޮމިޓީން ނިންމަން ހުށަހެޅުއްވީ ބާރަށު ދާއިރާގެ މެންބަރު އިބްރާހީމް ޝުޖާއުއެވެ. އެ ހުށަހެޅުއްވުމަށް ފުވައްމުލަކު އުތުރު ދާއިރާގެ މެންބަރު ހަމަދު އަބްދުﷲ ތާއީދުކުރެއްވިއެވެ. އެއާއެކު ކޮމިޓީން އެގޮތަށް ނިންމިއެވެ.
އަދި މޯލްޑިވްސް އެސޯސިއޭޝަން ފޯ ޓޫރިޒަމް އިންޑަސްޓްރީ (މަޓީ) އެދިގެން މިއަދުގެ ބައްދަލުވުން ވަނީ ސިއްރު ވެސް ކޮށްފައެވެ.
ސަރުކާރު ފަރާތުން ހުށަހެޅި ބޭރު ފައިސާ އާ ބެހޭ ބިލުގައިވާ ގޮތުން، ރިސޯޓުތަކާއި ގެސްޓްހައުސްތަކުގެ އިތުރުން މަދުވެގެން އަހަރަކު 15 މިލިއަން ޑޮލަރުގެ އާމްދަނީއެއް ލިބޭ ވިޔަފާރިތަކުން އެ ލިބޭ އާމްދަނީން ބައެއް ދެ ގޮތަކަށް މާރުކުރުމުގެ އިހްތިޔާރު ދީފައިވެއެވެ. އެއީ:
- ރިސޯޓުތައް ނަމަ އެ ތަންތަނަށް އަންނަ ކޮންމެ ފަތުރުވެރިއަކަށް 500 ޑޮލަރުގެ ރޭޓުން، ގެސްޓްހައުސް ފަދަ ވިޔަފާރިތައް ނަމަ 25 ޑޮލަރުގެ ރޭޓުން
- ނުވަތަ ކޮންމެ މަހަކު އެ ތަންތަނަށް ލިބޭ އާމްދަނީގެ 20 ޕަސެންޓު
މި ބިލު މަޖިލީހަށް ބަލައިގަނެ ކޮމިޓީއަށް ދިރާސާކުރަން ފޮނުވީ އިއްޔެއެވެ.
