މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއާ އޮޕަރޭޓާސް (މަޓާޓޯ) ގެ އަހަރީ ކުރެހުމުގެ މުބާރާތުގައި ބައިވެރިވުމުގެ ފުރުސަތު ހުޅުވާލައިފިއެވެ.
މަޓާޓޯ އިން މިއަދު އެކްސްގައި ކުރި ޕޯސްޓެއްގައި ބުނެފައިވަނީ "ފްރޭމް ބައި މާޓާޓޯ" ގެ ނަމުގައި ބާއްވާ މި ކުރެހުމުގެ މުބާރާތުގައި ޑިސެމްބަރު 10 އިން ފެށިގެން ޖެނުއަރީ 20 ގެ ނިޔަލަށް ބައިވެރި ވެވޭނެ ކަމަށެވެ.
ޖުމުލަ 4 އުމުރުފުރާއަކަށް ބަހާލައިގެން ކުރިއަށް ގެންދާ މި މުބާރާތަކީ ދިވެހި އުފެއްދުންތެރިންގެ ހުނަރު ފާހަގަކޮށް ރާއްޖޭގެ މުއްސަނދި ސަގާފަތް ފަންނުވެރިން މެދުވެރިކޮށް ފަތުރުވެރިންނަށް ދައްކާލުމަށް ބާއްވާ މުބާރާތެއްކަމަށް މަޓާޓޯއިން ވަނީ ބުނެފައެވެ.
މަޓާޓޯއިން ބުނީ ފަންނުވެރިންގެ މަސައްކަތްތަކަށް ފަނޑިޔާރުކަން ކުރަނީ ރާއްޖެއާއި ރާއްޖެއިން ބޭރުގެ މާހިރުން ހިމެނޭ ޕެނަލައަކުން ކަމަށާއި، މި ހުށަހެޅުންތަކުގެ ތެރެއިން ކޮންމެ އުމުރުފުރާއަކުން 10 މަސައްކަތެއް ޝޯޓްލިސްޓް ކުރެވޭނެ ކަމަށެވެ. އަދި އެއަށްފަހު މި މުބާރާތުގެ ވަނަތައް ހޮވިގެން ދާނީ ފެބްރުއަރީ މަހު ބާއްވާ އާޓް އެގްޒިބިޝަންގައި އާންމުންގެ ވޯޓުން ކަމަށް މަޓާޓޯއިން ވަނީ ބުނެފައެވެ.
މަޓާޓޯއިން ބުނީ މި މުބާރާތް އިންތިޒާމް ކުރުމުގައި ގިނަ ފަރާތްތަކެއް ބައިވެރިވާކަމަށާއި އޭގެ ތެރޭގައި ޓޫރިޒަމް މިނިސްޓްރީ، އެމްއެމްޕީއާރްސީ، ޔޫތް މިނިސްޓްރީ، އެންސީއޭ، މަޓީ އަދި އެމްއޭސީގެ އިތުރުން ނޭޝަނަލް ހޮޓެލްސް އެންޑް ގެސްޓްހައުސެސް އެސޯސިއޭޝަން އޮފް މޯލްޑިވްސް (އެންއެޗްޖީއޭއެމް) ވެސް ހިމެނޭ ކަމަށެވެ.
