މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއާ އޮޕަރޭޓަސް، (މަޓާޓޯ) އިން ބާއްވާ މޯލްޑިވްސް ޓްރެވަލް ކޮންފަރެންސް 2025ގެ ވިމެންސް އެޑިޝަން، އައްޑޫ ސިޓީގައި ބާއްވަން ނިންމައިފިއެވެ.
މި މަހުގެ 25 ވަނަ ދުވަހު ބާއްވާ މި ކޮންފަރެންސްއާއި ގުޅޭ ގޮތުން މަޓާޓޯއިން ބުނީ މިއީ ފަތުރުވެރިކަމުގެ ސިނާއަތުގައި މަސައްކަތްކުރާ އަންހެނުން ބާރުވެރިކުރުވުމަށް ބައްވާ ކޮންފަރެންސެއް ކަމަށެވެ.
މި ކޮންޕަރެންސް ކުރިއަށް ގެންދިއުމަށް ހަމަޖެހިފައިވަނީ ޓޫރިޒަމް މިނިސްޓްރީ އާއި މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓް، އެމްއެމްޕީއާރްސީ، ވިޒިޓް މޯލްޑިވްސް، އައްޑޫ ސިޓީ ކައުންސިލް، ނެޝަނަލް ހޮޓެލްސް އެންޑް ގެސްޓް ހައުސް އެސޯސިއޭޝަން އޮފް މޯލްޑިވްސްގެ އިތުރުން އަންހެނުންގެ ތަރައްގީއަށް މަސައްކަތްކުރާ އެކި ޖަމްއިއްޔާތަކާއި ގުޅިގެންނެވެ.
މީގެ އިތުރުން މަޓާޓޯއިން ބުނީ މިކޮންފަރެންސްގައި ކީނޯޓް ސްޕީކަރުންގެ ގޮތުގައިވެސް އަދި ޕެނަލް ޑިސްކަޝަންތަކުގައިވެސް ވާހަކަދެއްކުމަށް ހަމަޖެހިފައިވަނީ އަންހެނުންކަމަށެވެ. މި ކޮންޕަރެންސްގައި އައްޑޫގައި އަންހެނުންނަށް ހުރި ފުރުސަތުތަކާއި އާމްދަނީ ހޯދުމަށް މަސައްކަތްކުރާ އަންހެނުންނާ މެދު މުޖުތަމައުގައި އޮންނަ ނޭދެވޭ ނަޒަރު ބަދަލުކުރުމުގެ މައްޗަށް ވާހަކަދެއްކުމަށް ވަނީ ހަމަޖެހިފައެވެ. އަދި ފަތުރުވެރިކަމުގެ ދާއިރާގެ ވަޒީފާތައް ހަމައެކަނި ރިސޯޓުތަކާ ހިސާބަށް ހަނިވެފައި އޮންނަ ކަމަށް ޤަބޫލުކުރެވިފައި އޮންނަ އޮތުމާއި ދެކޮޅަށްވެސް މި ކޮންޕަރެންސްގައި ވާހަކަދެއްކުމަށް ވަނީ ހަމަޖެހިފައެވެ.
މި ކޮންފަރެންސްގެ ތެރެއިން ބީސީސީއާއި ގުޅިގެން އަންހެނުންނަށް އަމާޒުކޮށް، ފައިނޭންޝަލް ލިޓްރަސީ ޓްރޭނިން ސެޝަނެއް ކުރިއަށްގެންދިޔުމަށް ހަމަޖެހިފައިވާއިރު ހިލޭ ކުރިއަށްގެންދާ މިސެޝަންގައި ރަޖިސްޓްރީވުމުގެ ފުރުސަތު މިމަހުގެ 20 ވަނަ ދުވަހާ ހަމައަށްވަނީ ހުޅުވާލާފައެވެ.
