މިހާރު ރާއްޖޭގައި ދުއްވަމުން އަންނަ މަސްވެރި އުޅަނދުތަކުގެ 80 އިންސައްތަ އުޅަނދުގައި ބޭނުންކުރަނީ ސުޒުކީ އިންޖީނު އަޅައިގެން ދުއްވާ އުޅަނދުތައް ކަމަށް އެމްޓީސީސީގެ މެނޭޖިން ޑިރެކްޓަރު ޑީސީޕީ ރިޓަޔާޑް އަހުމަދު ސައުދީ ވިދާޅުވެއްޖެއެވެ.
"ޔަންމާ" މަރުކާ ރާއްޖެއަށް ތާއާރަފްކުރިތާ 50 އަހަރު ފުރުމުގެ މުނާސަބަތުގައި ރޭ ހޮޓެލް ޖެންގައި ބޭއްވި ހާއްސަ ޖަލްސާގައި ސައުދީ ވިދާޅުވީ ވޭތުވެދިޔަ 50 އަހަރުގައި ރައްޖޭގެ މަސްވެރިކަމަށް ވަރަށް ބޮޑެތި ބަދަލުތައް އައިސްފައިވާކަމަށާއި ރިޔާ ދޫކޮށް އިންޖީނު ދޯނީގެ ހުންގާނުގައި ދިވެހީން ހިފި ހިސާބުން ފެށިގެން މަސްވެރިކަން ވަރަށް ބޮޑަށް ކުރިއަރާފައިވާކަމަށެވެ.
އައު އީޖާދީ ޓެކްނޮލޮޖީގެ އެހީގައި މަސްވެރިން މަސްއައިނު ހޯދުމާއި މަސް ބޭނުމަށް ގިނަގުނަ ފަސޭހަތަކެއް ލިބިގެން ދިޔަކަން ފާހަގަކޮށް ސައުދީ ވިދާޅުވީ 1979 ވަނަ އަހަރުގައި އޭރުގެ ސަރުކާރުން ވޯލްޑް ބޭންކުގެ އެހީގައި 500 ރިޔަލުދޯނީގައި އިންޖީނު އެޅުން ވެގެންދިޔައީ އޭރު ރާއްޖޭގައި ހިންގުނު އެންމެ ކާމިޔާބީ އިންގިލާބީ އެއް ބަދަލު ކަމަށެވެ. އަދި އިތުރުވަމުން އައި ޑިމާންޑަށް އެމްޓީސީސީއިން އޮޑިވެރީންނަށް އިންޖީނު ފޯރުކޮށްދެމުން ދިޔަކަން ފާހަގަކޮށް ސައުދީ ވިދާޅުވީ އޭގެ ނަތީޖާއެއްގެ ގޮތުން މިހާރު ރާއްޖޭގަ މަސްވެރި އުޅަނދުތަކުގެ 80 އިންސައްތަ އުޅަނދަކީ ޔަންމާ އިންޖީނު އަޅާފައިވާ އުޅަނދުތައް ކަމަށެވެ.
ސަރުކާރުން ރާއްޖެއަށް ފަސްވަނަ ޖެނެރޭޝަންގެ މަސްދޯނިފަހަރު ތައާރަފްކުރަން މަސައްކަތް ކުރަމުންދާއިރު އެމްޓީސީސީއިން ވަނީ ކަސްޓަމަރުންނަށް އިންޖީނު ލިބުމަށް މިހާރު ހޭދަވާ ހަމަހާއި ހަތް މަސްދުވަހުގެ މުއްދަތު އެއަށްވުރެ ކުޑަ ކޮށްދިނުމަށް ޔަންމާގައި އެދިފައެވެ.
ރޭ ބޭއްވި މި ރަސްމިއްޔާތުގައި ޝަރަފުވެރިކަމުގެ އިނާމު ލިބުނު ފަރާތްތަތަކަށް ހަނދާނީ ފިލާ އަރުވާފައިވާއިރު، އެމްޓީސީސީ އިން ވަނީ ޔަންމާ އޭޝިއާއަށް، އަދި ހާއްސަކޮށް މަސާރޫ ހިރޯސް، ޖެކްސަން ޓަން އަދި އެމީހުންގެ ޓީމަށް ޝުކުރުއަދާކޮށްފައެވެ. މީގެ އިތުރުން އެމްޓީސީސީއިން ވަނީ މި ޕާޓްނާޝިޕުގެ އަގުވަޒަންކޮށް، ކުރިއަށް އޮތް އަހަރުތަކުގައިވެސް އެކުގައި ކާމިޔާބީގެ ދަތުރު ކުރިއަށް ގެންދިއުމަށް ކެތްމަދުވެފައިވާކަން ހާމަކޮށްފައެވެ.
