ދިވެހިރާއްޖޭގެ ގާނޫނު އަސާސީއަށް ގެނައި އިސްލާހުގެ ސަބަބުން ރައްޔިތުންގެ ބާރުވެރިކަން އިތުރު ވެފައި ވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އެގޮތުން ރައީސް ވިދާޅުވީ، އެ އިސްލާހުގެ ސަބަބުން ދައުލަތުގެ ސިޔާދަތީ ބާރާއި އެ ބާރު ހިނގާ ސަރަހައްދު އިއުލާންކޮށް ކަނޑައެޅުމާއި، ރައްޔިތުންގެ ބާރު ކަނޑައެޅުމާއި، ރައްޔިތުންގެ ހައްގުތަކާއި ޒިންމާތައް ކަނޑައެޅުމާއި، ދައުލަތުގެ ގާނޫނީ ވެރިކަން ހިންގުމުގެ ނިޒާމާއި ތަރުތީބާއި އިންތިޒާމުތައް ކަނޑައެޅުން އެ އިސްލާހުތަކުގައި ހިމެނުމަކީ ރައްޔިތުންގެ ދިފާއުގައި ކުރެއްވި ކަމެއް ކަމަށެވެ.
ރޭ އއ މަތިވެރީގައި އެރަށުގެ ރައްޔިތުންނާ ބައްދަލު ކުރައްވައި ރައީސް ވަނީ، ގާނޫނު އަސާސީއަށް ގެނައި އިސްލާހުތަކުގެ މަގުސަދު ހިއްސާ ކުރައްވާފައެވެ. ރައީސް ވިދާޅުވީ، ރާއްޖޭގެ ހާއްސަ އިގްތިސޯދީ ސަރަހައްދުގެ އެންމެ އަކަ އިންޗިއަކަށްވެސް ދެން ބަދަލެއް ގެނެވޭނީ، ރައްޔިތުންގެ މަޖިލީހުގެ އައުލަބިއްޔަތުގެ ހަތަރުބައިކުޅަ ތިންބައިގެ ވޯޓުގެ އިތުރުން، ރައްޔިތުންގެ ފެންނަ ނުފެންނަ ވޯޓަކަށް ގޮސް، މަދުވެގެން 143،332 ރައްޔިތުންގެ ރުހުމާވެސް އެކުގައިކަމަށެވެ.
ގާނޫނު އަސާސީގެ 251 ވަނަ މާއްދާއަށް ގެނައި ބަދަލާއެކު، ދިވެހިރާއްޖޭގައި އަސްކަރީ އެންމެ ބޫޓު ޖޯޑެއް ވެސް މިހާރު ނުހުންނާނެ ކަމަށާއި، ރާއްޖޭގައި ބޭރު ބަޔަކު ތިބޭނަމަ ރައްޔިތުންގެ މަޖިލީހުގެ އައުލަބިއްޔަތު ހޯދަންޖެހޭނެކަން އެމަނިކުފާނު ފާހަގަ ކުރެއްވިއެވެ. އަދި، އެއްބަސްވުމެއްގެ ދަށުން ބާއްވާ އަސްކަރީ ތަމްރީނުތަކުގައި ބައިވެރިވުން ފިޔަވައި، ރައްޔިތުންގެ މަޖިލީހުގެ ޖުމްލަ މެންބަރުންގެ އައުލަބިއްޔަތުން ފާސްވެގެން މެނުވީ، އަސްކަރީ ބޭނުމަކަށް، ދިވެހިރާއްޖޭގެ ސަރަހައްދުގައި ބޭރުގެ ސިފައިން އެއްވެސް ސިފައެއްގައި އަމަލީގޮތުން ހަރަކާތްތެރިވުމަށް ހުއްދަ ދިނުންވެސް ވަނީ މަނާކޮށްފައެވެ.
ރައްޔިތުންގެ މަޖިލީހުގެ މެންބަރަކަށް ވުމުގެ ޝަރުތުތަކަށް ގެނައި ބަދަލުންވެސް ހިމާޔަތް ކޮށްދެނީ ރައްޔިތުންގެ ހައްގުތައް ކަމަށް ރައީސް ވިދާޅުވިއެވެ. މެމްބަރުން އިންތިހާބުގައި ވާދަކުރަނީ ވަކި ފިކުރެއް ނުވަތަ ޕާޓީއެއް ތަމްސީލުކުރާ މީހެއްގެ ގޮތުން ކަމަށާއި، އެހެންކަމުން، އިންތިހާބުވާ މެންބަރާއި ދާއިރާގެ ރައްޔިތުންނާ ދެމެދު ވަނީ އަހުދެއްކަން އެމަނިކުފާނު ފާހަގަ ކުރެއްވިއެވެ. އެ އަހުދުގައި މެންބަރު އެއްބަސް ވަނީ ގާނޫނު އަސާސީގައި ބުނާ މަސްއޫލިއްޔަތު އަދާކުރުމަށް ކަމަށާއި، ގާނޫނު އަސާސީއަށް ގެނައި އިސްލާހުގެ ސަބަބުން މެންބަރުން ވީ އަހުދު ހިމާޔަތް ކުރެވިގެން ދާނެކަމަށް އެމަނިކުފާނު ވިދާޅުވިއެވެ.
ގާނޫނު އަސާސީއަށް އިސްލާހެއް ގެނައުމުގެ ކުރިން ރައްޔިތުންގެ ވޯޓުން ފާސްކުރަންޖެހޭ ހާލަތްތަކަށް ރިއާޔަތް ކުރައްވަމުން، ފެންނަ ނުފެންނަ ވޯޓާމެދު ގޮތް ނިންމުމަށް، މަދު މީސްކޮޅެއްގެ މުށުތެރޭގައި އޮތް ބާރު، ގާނޫނު އަސާސީއަށް ގެނައި އިސްލާހާއެކު ރައްޔިތުންގެ އަތްމައްޗަށް ދޫކޮށްލެވިފައި ވާކަން އެމަނިކުފާނު ފާހަގަ ކުރެއްވިއެވެ.
މީގެ އިތުރުން، ރައީސުލްޖުމްހޫރިއްޔާގެ މަސްއޫލިއްޔަތަށް ގެނައި ބަދަލަކީ، ދިގު ރާސްތާ އާއި ކުރު ރާސްތާގެ ތަރައްގީގެ ޕްލޭންތައް ހެދުމުގެ މަސްއޫލިއްޔަތު ރައީސް އާ މަތިކުރެވިފައި ނުވާތީ، އެކަމަށް ގެނައި އިސްލާހެއްކަން އެ މަނިކުފާނު ފާހަގަ ކުރެއްވިއެވެ.
ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީއަށް 6 ވަނަ އިސްލާހު ގެނައުމުގެ ބިލު، ރައީސުލްޖުމްހޫރިއްޔާ ތަސްދީގު ކުރައްވާފައި ވަނީ ނޮވެންބަރު 20، 2024 ގައެވެ.
