ކީރިތި ގުރުއާން ލިއުމާއި އިސްލާމިކް ކެލިގްރަފީ ދާއިރާއިން އާދަޔާ ހިލާފު ފަންނުވެރިކަން ދައްކާލި، ދަރިވަރު ހުސައިން ނާއިޝްއާއި އޭނާގެ އާއިލާއާ އިސްލާމިކް މިނިސްޓަރު މުހައްމަދު ޝަހީމް އަލީ ސައީދު ބައްދަލު ކުރައްވައިފިއެވެ.
ވާހަކަ ދެއްކުމާއި އިވުމުން މަހުރޫމްވެފައިވާ ނާއިޝް ތައުލީމު ހާސިލް ކުރަމުންދާ ޖަމާލުއްދީން ސްކޫލުގެ ފާރުތަކުގައި އިސްލާމިކް ކެލިގްރަފީގެ ރީތި ލިޔުންތަކުން ޖަރީކޮށްލި ފޮޓޯތަކަށް ދާދިފަހުން ވަނީ ބޮޑު ތަރުހީބެއް ލިބިފައެވެ. އޭނާގެ މި ހުނަރުން އެންމެން އާޝޯހު ކޮށްފައިވާއިރު ގިނަ ބަޔަކު ވަނީ އެ ރީތި ލިޔުންތަކަށް ތައުރީފުކޮށް ވާހަކަ ދައްކާފައެވެ.
އެއާއެކު އިސްލާމިކް މިނިސްޓަރު މުހައްމަދު ޝަހީމް އަލީ ސައީދު މިއަދު ވަނީ ނާއިޝް އާއި އޭނާގެ އާއިލާއާ ބައްދަލުކުރައްވާ ނާއިޝްއަށް އެކި ގޮތްގޮތުން އެހީތެރިވާން ނިންމަވާފައެވެ.
އެގޮތުން ދާއިރާއިން ބޭނުންވާ ހުނަރުތަރައްގީކޮށް ދަސްކުރުމަށް އެހީތެރިވުމާއި ގްރޭޑް 10ގައި މިހާރު ކިޔަވަމުން އަންނަ ދަރިވަރުގެ ސްކޫލު ނިމުމުން، ގުރުއާނާ ބެހޭ މަރުކަޒުގައި، މި ހުނަރު އެހެން ކުދިންނަށް ދަސްކޮށްދިނުމަށް އޭނާއާ ހަވާލުކުރުމަށް ޝަހީމް ނިންމަވާފައި ވެއެވެ.
އަދި ހަމައެހެންމެ އަންނަ އަހަރު ހުޅުވާ އައްޑޫގެ އިސްލާމިކް ސެންޓަރާއި ހިތަދޫ އިސްލާމިކް ސެންޓަރާއި ފުވައްމުލަކު ގުރުއާން މަރުކަޒުގައި ނާއިޝްގެ އިސްލާމިކް ކެލިގްރަފީގެ ލިޔުންތައް ބެހެއްޓުމުގެ އިތުރުން އިސްލާމިކް ކެލިގްރަފީ ހެދުމަށް ބޭނުންވާ ޒަމާނީ ވަސީލަތްތައް ހޯދައިދިނުމަށް ވެސް ވަނީ ނިންމާފައެވެ. އަދި މި ދާއިރާއިން އިތުރު ހުނަރު އޭނާއަށް ދަސްކޮށްދިނުމަށް ދާއިރާގެ ފަންނުވެރިޔަކު ހަމަޖެއްސުން ވެސް ހިމެނެއެވެ.
މިނިސްޓަރު ވިދާޅުވީ އިސްލާމީ ދާއިރާތަކުން ކުރިއަށް ދާން ޝައުގުހުރި ހުރިހާ ދަރިވަރުންނަށް މިފަދަ ފުރުސަތުތައް އޮންނާނެ ކަމަށެވެ.
