މިއަދަށް ތާވަލުކުރި ރައްޔިތުންގެ މަޖިލީހުގެ ޖަލްސާ އަންނަ ހޯމަ ދުވަހަށް ފަސްކޮށްފިއެވެ.
ރައްޔިތުންގެ މަޖިލީހުގެ ޖަލްސާ އެއް މިއަދު ހެނދުނު 9 ޖަހާއިރު އޮންނާނެ ކަމަށް، އިއްޔެގެ ޖަލްސާ ނިންމަވާލައްވަމުން ރިޔާސަތުގައި އިންނެވި މަޖިލީހުގެ ނައިބު ރައީސް އަހްމަދު ނާޒިމް ވިދާޅުވިއެވެ.
މަޖިލީހުގެ ގަވައިދުގައިވާ ގޮތުން، ޖަލްސާ ފެށުމުގެ މަދުވެގެން ހަ ގަޑިއިރު ކުރިން މެންބަރުންނަށް ޖަލްސާގެ އެޖެންޑާ ފޮނުވަން ވާނެއެވެ. އަދި އާންމު ގޮތެއްގައި ޖަލްސާ ފެށުމުގެ މަދުވެގެން 12 ގަޑިއިރު ކުރިން މަޖިލީހުގެ ވެބްސައިޓުގައި ޖަލްސާގެ އެޖެންޑާ އަބަދު ވެސް އާންމުކުރެއެވެ. ނަމަވެސް ރޭ މެންދަމު 3 ޖެހުމާ ހަމައަށް ޖަލްސާގެ އެޖެންޑާ އާންމެއް ނުކުރެއެވެ.
އެހެންވެ، ރައްޔިތުންގެ މަޖިލީހުގެ ޖަލްސާ ނެތްތޯ މަޖިލީހުގެ އިދާރާގެ ރަސްމީ މީޑިއާ ގްރޫޕްގައި ސުވާލުކުރުމުން މަޖިލީހުގެ މީޑިއާ އޮފިޝަލަކު ވިދާޅުވީ، ޖަލްސާ އެއް ދެން ބާއްވަން ހަމަޖެހިފައިވަނީ އަންނަ ހޯމަ ދުވަހު ކަމަށެވެ. ނަމަވެސް ޖަލްސާ ފަސްކުރި ސަބަބު ހާމައެއް ނުކުރެއެވެ.
ފާހަގަކުރެވޭ ގޮތުގައި މަޖިލީހުގެ ރައީސް އަބްދުއްރަހީމް އަބްދުﷲ ވަނީ މަޖިލީހުގެ މި ހިނގާ ދައުރު މި މަހުގެ 15 ވަނަ ދުވަހަށް ދަންމާލަން ހުށަހަޅުއްވައިފައެވެ. އަދި މަޖިލީހުން ވަނީ ދައުރު ދަންމާލަން ނިންމައިފައެވެ.
ރައްޔިތުންގެ މަޖިލީހުގައި މިވަގުތު ކުރިއަށް ދާ މަސައްކަތްތަކުގެ ތެރޭގައި އިޒްރޭލު ޕާސްޕޯޓް މަނާކުރުމަށް ހުށަހެޅި އިސްލާހު ކޮމިޓީގައި ދިރާސާކުރުމާއި، މަސްތުވާތަކެއްޗާ ބެހޭ ގާނޫނަށް އިސްލާހު ގެނައުމުގެ ބިލާއި ބަންޑާރަނައިބުގެ އޮފީހުގެ ބިލުގެ މަސައްކަތް ހިމެނެއެވެ.
