ކުރީގެ ނައިބު ރައީސް އަބްދުﷲ ޖިހާދުގެ މައްޗަށް ދައުލަތުން ދައުވާކުރާ މައްސަލާގެ އިސްތިއުނާފް ބަލައިނުގަތުމަށް ހައި ކޯޓުގެ ރަޖިސްޓްރާ ނިންމެވި ނިންމެވުމަށް އެ ކޯޓުގެ ފަނޑިޔާރުންގެ މަޖިލީހުން ވެސް ނިންމައިފިއެވެ.
ޖިހާދުގެ މައްޗަށް ޕީޖީއިން ކޮށްފައިވަ ދައުވާއަކީ ފުށިދިއްގަރުފަޅު ސްޕެޝަލް ޓުއަރިސްޓް ޒޯނެއްގެ ގޮތުގައި ތަރައްގީ ކުރުމަށް ޖެނުއަރީ، 2013، ގައި ފައިނޭންސް މިނިސްޓަރަކަށް ހުންނަވައި ޖިހާދު ސޮއި ކުރެއްވި މައްސަލައިގައެވެ.
މިހާރު މޯލްޑިވްސް އިންޓަނޭޝަނަލް ފައިނޭންޝަލް ސާވިސަސް އޮތޯރިޓީގެ ޗެއާޕާސަން ޖިހާދުގެ މައްސަލަ ޕީޖީ އޮފީހުން ހައި ކޯޓަށް ފޮނުވި ނަމަވެސް ހައިކޯޓުން އެ މައްސަލަ ބޭރުކޮށްލީ ޖިހާދު ދިރިއުޅުއްވާ ގޭގެ އެޑްރެސް ސާފު ނުކުރެވޭތީ ޗިޓު ހަވާލު ނުކުރެވިގެންނެވެ. އަދި މި މައްސަލަ މިދިޔަ އޮކްޓޯބަރު މަހުގެ 15 ވަނަ ދުވަހު އަލުން، ލިޔެކިއުންތަކާއި އެކު ހައިކޯޓަށް ހުށަހަޅާފައިވާއިރު ހައި ކޯޓުން ނިންމި ނިންމުމުގައި ބުނީ، ޖިހާދުގެ މައްސަލަ އަލުން ހުށަހެޅުމަށް ޕީޖީއަށް ދިން މުއްދަތު ހަމަވެފައިވާ ކަމަށެވެ. އެހެންކަމުން އެ މައްސަލަ އެ ކޯޓަށް ބަލައިނުގަތުމަށް ނިންމާފައިވާކަމަށް ހައިކޯޓުން ވަނީ ބުނެފައެވެ.
ހައިކޯޓުގެ އެ ނިންމުން ރިވިއުކުރުމަށް ދައުލަތުން، ފަނޑިޔާރުންގެ މަޖިލީހަށް ހުށަހެޅުމުން އެ މަޖިލީހުގެ ދެ ފަނޑިޔާރުންގެ އައުލަބިއްޔަތުން ނިންމާފައިވަނީ ރަޖިސްޓްރާގެ ނިންމުން ބާތިލްކުރަން ޖެހޭ ތަނެއް ކަމަށެވެ.
